رواية ديون النبض الفصل الثامن والعشرون28 بقلم مروة صياح

رواية ديون النبض 
الفصل الثامن والعشرون28
بقلم مروة صياح
بعد ما حازم سابنا ودخل، بصيت لمجد، وما كنتش عارفة أقوله إيه، لكنه بصلي وقال:

مجد: على فكرة يا وعد، حازم بيتكلم صح، وده القرار اللي أنا أخدته أنا كمان. إنتِ لحد دلوقتي ما أكدتيش موافقتك ليا.

وعد: مجد، أنا خايفة من الخطوة دي أوي.

مجد: خايفة من إيه يا وعد؟ إنتِ شاكة إني مش هحافظ على مستقبلك؟

وعد: لأ يا مجد، أنا ما أقصدش كده، بس مش عارفة أقولك إيه. أنا لسه قدامي سنتين، وسنة الامتياز، وفي نفس الوقت الجواز مسؤولية. يعني بيت وزوج وأولاد، وأنا خايفة ما أكونش قد المسؤولية دي دلوقتي، وخايفة أقصر.

مجد: يا وعد، كل ده مقدور عليه. الحياة الزوجية بين أي اتنين المفروض تكون مشاركة في كل حاجة.

سكت لحظة، وبعدها بصلي بتردد وقال:

مجد: وعد، لو إنتِ خايفة من موضوع الأولاد، ممكن نأجله شوية لحد ما تخلصي دراستك، مع إني نفسي أوي في طفل منك.

وطيت راسي، وحسيت بخجل شديد، لكنه بصلي وضحك وقال:

مجد: وعد، أنا عارف إني صريح معاكي، بس إنتِ كل شوية توطي راسك كده ليه؟ مش بقولك أنا كل شوية هرفعلك راسك!

وعد: طيب، ممكن نخلص امتحاناتي الأول، وبعدها نتكلم في الموضوع ده؟

مجد: إنتِ هتخلصي امتحاناتك، وهتكوني في بيتي يا وعد.

بصلي بنظرة كلها شوق وحب، وكمل كلامه:

مجد: وهتكوني برضه في حضني، وحازم ولا غيره هيقدر يمنعني.

حسيت إن ضربات قلبي بتزيد، وجسمي بدأ يرتجف، ولما لاحظ ده، أخدني في حضنه بسرعة.

وعد: مجد، بعد إذنك ابعد.

مجد: بالرغم إني وعدت حازم ووعدتك، بس مش قادر يا وعد، مش قادر، صدقيني.

وعد: لازم تقدر عشان خاطري، واللي إحنا بنعمله ده غلط.

هز راسه وقال:

مجد: حاضر يا وعد.

وبعدها دخلنا وكملنا ليلتنا مع بعض، ضحك وهزار زي عادتنا.

كنت قاعدة ما بين حازم وياسين، وكعادتي ما كنتش بكمل القعدة من غير هزار وضحك، لكن المرة دي ما كملتهاش بمزاجي. لقيت نفسي برجع أفكر في دكتورة جيهان وكلامها، فسندت راسي على كتف حازم وغمضت عيني.

كنت سامعة كل حاجة بتحصل حواليا، لكن اتظاهرت بالنوم، لحد ما حازم، أخويا، شالني ودخلني أوضتي وحطني على السرير.

فضلت نايمة تاني يوم لحد قبل الظهر بوقت بسيط. كلهم كانوا مستغربين إني نايمة كل ده، لكن حازم وياسين ومجد كانوا راحوا يصلوا الجمعة ورجعوا، وماما ورغد كانوا حضروا الفطار.

كنت صحيت، لكن حاسة بكسل شديد جدًا. طول الليل كنت بتقلب في أفكاري، أفكر وأرجع أفكر، وفي الآخر ما وصلتش لأي قرار.

كنت مترددة بين وعدي لدكتورة جيهان، وبين إني مش هقدر أسيب مجد. وحتى بعد ما كنت باخد قرار بيني وبين نفسي، كنت برجع أفكر فيه من جديد.

حازم، أول ما رجع من الصلاة ولقاني لسه تعبانة، قرر يغلس عليا كعادته.

حازم: مالك يا دكتورة وعد؟

وعد: حاسة إني كسلانة أوي، ومش قادرة أعمل حاجة.

حازم: لأ بقى، دي مش إجازة! أنا مش متعود عليكِ كده. إنتِ هتفوقي معايا ولا هغلس عليكي أكتر؟

جريت عليه ومسكت في رقبته وقلت:

وعد: حازم، شيلني بعد إذنك.

حازم: يا سلام! أشيلك بس؟

وفعلًا شالني وبدأ يلف بيا في المكان، وأنا بضحك. كنت محتاجة أهرب من التفكير ده شوية، وأرجع لوعد اللي متعودة عليها، اللي بتضحك وتهزر مع حازم.

دخل ياسين ومجد، وأول ما شافونا بالحالة دي، فضلوا يضحكوا ويهزروا معانا.

وبعدها اتجمعنا كلنا عشان نفطر، لكن المرة دي كان عند حازم وياسين ومجد اقتراح مختلف.

حازم: النهارده إحنا اللي هنحضر الغدا.

بصيت لرغد وماما، وكلنا حطينا إيدينا على بطننا وانفجرنا في الضحك!

فهموا إحنا بنقصد إيه، لكنهم ردوا بكل ثقة:

ياسين: طب استنوا بس، هتشوفوا أكلنا هيطلع أحلى من أكلكم إزاي!

وفعلًا، دخلوا التلاتة المطبخ، وسابونا قاعدين مع بعض.

كنت أنا وماما ورغد بنتكلم في مواضيع مختلفة، لحد ما وصلنا للطفل المنتظر اللي كلنا مستنيينه.

وعد: يا ترى هيكون ولد ولا بنت؟ ولو ولد هنسميه إيه؟ ولو بنت هنسميها إيه؟ طب إمتى هنشتري له هدوم؟ يا ده لسه فاضل شهور على ما ييجي، وأنا مشتاقة أوي يكون موجود معانا! عايزة أحس بروح صغيرة تجري وتلعب وسطنا.

كانوا بيضحكوا وبيبتسموا من قلبهم وهما بيسمعوني، وأنا كل شوية أتحمس لسؤال جديد.

عدى وقت، وكنت كل شوية أدخل عليهم المطبخ وأسألهم:

وعد: خلصتوا ولا لسه؟ على فكرة أنا جعانه!

كانوا بيضحكوا ويقولوا لي:

حازم: يا بنتي إحنا لسه فاطرين وإنتِ عايزانا نتغدى إمتى؟ لسه بدري على ميعاد الغدا!

وكنت أضحك وأرجع مكاني، لحد ما وقفت شوية في البلكونة لوحدي.

حتى وأنا بحاول أندمج معاهم وأضحك، كان التفكير لسه موجود، مش راضي يبعد عني.

لكن المرة دي، كانوا فعلًا أنجزوا الغدا.

اتجمعنا كلنا على السفرة، ولما شوفنا الأصناف اللي عاملينها، أنا وماما ورغد بصينا لبعض مندهشين.

وعد: على فكرة بقى، أكلكم أحلى من أكلنا!

وبصيت لماما ورغد وكملت:

وعد: خلاص، كفاية عليكم شغل المطبخ طول الأسبوع، وهما عليهم يوم الجمعة يقفوا يجهزوا لنا الغدا.

حازم: وإنتِ يا دكتورة، هتعملي إيه؟

وعد: لا، أنا هاكل على الجاهز، ومش هعمل حاجة! واعمل حسابك، السنة اللي جاية جديدة وصعبة، واللي بعدها هتكون أشد وأصعب.

حازم: طيب، ولما تكوني مع مجد، هتعملي إيه؟

سكت لحظة، وحسيت إن الموضوع رجع يتفتح من جديد، فقلت بنرفزة:

وعد: هو إنتوا كل شوية تجيبوا سيرة الموضوع ده؟ أنا قلت لكم لسه ما أخدتش قرار في موضوع الجواز! وبعد إذنكم، محدش يفتحه تاني غير لما أخلص امتحاناتي، وأقرر إذا كنت فعلًا موافقة ولا لأ.

مجد اتصدم من كلامي، وأنا أخدت بالي إنه اتضايق، فبصيت له وقلت:

وعد: مجد، أنا مش عايزاك تتضايق، بس فعلًا إنتوا كلكم بتكلموني في الموضوع كل شوية، وأنا حاسة إني مضغوطة من كلامكم ده. ممكن أركز في خطوة خطوة؟ أنا مش قادرة أركز في كذا حاجة مع بعض.

سكت لحظة، وبعدها كملت:

وعد: وبعدين إنتوا عارفين إني بانشغل جدًا بالكلام وبالمواقف اللي بتحصل حواليا، فإنتوا كده بتعطلوني عن مذاكرتي.

مجد بصلي وهز راسه وقال بهدوء:

مجد: حاضر يا وعد، اللي إنتِ عايزاه.

بصيت لهم كلهم ومجد وقال:

مجد: ممكن بعد إذنكم محدش يفتح الموضوع ده تاني؟ بس مش معنى كده إننا أجلنا كلامنا فيه، ولا إننا أجلنا قرارنا. أنا بس عايزة أخلص امتحاناتي الأول.

وعد: برضه بترجع لنفس النقطة يا مجد! أنا قلت لسه ما أخدتش قرار فيه.

سيبتهم ودخلت الأوضة، ورايا نظراتهم المستغربة، وكلهم مش فاهمين إيه اللي حصل لي بالضبط.

بعد شوية، سمعت خبط على الباب، وحازم دخل وقعد جنبي.

حازم: في إيه يا وعد؟ مالك؟ أنا أول مرة أشوفك بالطريقة
دي..

ديون النبض 🫀

بقلم الكاتبه مروة صياح 🎯 ✍️

حازم: في إيه يا وعد؟ مالك؟ أنا أول مرة أشوفك بالطريقة دي.

قعد حازم جنبي، وبصلي باهتمام، فبصيت له وقلت بضيق:

وعد: كلكم بتتكلموا في نفس النقطة! مهما نبعد عنها، ومهما نحاول نأجل الكلام فيها، بترجعوا تقربوني منها تاني. وإنتوا عارفين إني بانشغل بالكلام وبالمواقف اللي بتحصل حواليا، وإنتوا كده بتضغطوا عليا. أنا المفروض أفكر في مذاكرتي، والله بقيت مش عارفة أفكر في إيه دلوقتي!

حازم: بس إنتِ زعلتي مجد قوي.

وعد: ومجد برضه متسرع ومستعجل، وفي نفس الوقت الجواز مسؤولية كبيرة يا حازم.

بصلي حازم باستغراب وقال:

حازم: مسؤولية إيه يا وعد؟ إحنا هنا كلنا مع بعض، أسرة واحدة. إيه اللي هيتغير؟ بدل ما تكوني مع ماما هنا، هتكوني مع مجد في شقتكم، وإحنا كلنا جنب بعض.

وعد: لأ يا حازم، الجواز مسؤولية كبيرة جدًا، غير إنه حب واحتواء. أنا إزاي هكون مسؤولة عن زوج وبيت، وفي نفس الوقت عندي دراستي وأهدافي وطموحاتي؟
إحنا مش بنذاكر دراسة نظرية وخلاص، إنت عارف يعني إيه إن وقتنا مش ملكنا، وإننا ساعات بنكون مضطرين نقضي ساعات طويلة في المستشفى.

سكت شوية، وبعدها كملت كلامي:

وعد: وبعدين، نفترض إني وافقت على الجواز، وأخدت قرار إني أأجل موضوع الإنجاب. إنت عارف إني مش بحب حاجة زي دي تكون ضد إرادتي، أو أحس إني بمنع حاجة ربنا أراد وجودها. أنا مش عايزة أخد قرار زي ده وأنا مش مرتاحة له.

حازم: إنتِ ليه معقدة الدنيا قوي كده؟ إيه المشكلة؟ وبعدين، إنتِ مفترضة ليه إن مجد هيسيبك؟ لو اتجوزتوا وحصل حمل زي ما بتقولي، هو مجد هيسيبك؟ ده هيكون معاكي في كل حاجة.

قرب مني، وبصلي بجدية، وقال:

حازم: يا وعد، مجد بيحبك ومستعد يضحي بأي حاجة عشانك.

رفعت راسي أول ما سمعت الجملة دي، وفضلت باصة له باستغراب.

*هو يعرف حاجة ومخبيها عليا؟*

السؤال جه في بالي، لكن حازم سكت، وأنا ما قدرتش أسأله.

حازم: وعد، أنا مش هضغط عليكي دلوقتي في أي كلام ولا أي موضوع. خلصي امتحاناتك، وبعدها نتكلم في الموضوع براحتنا.

وعد: طيب وماما؟ إزاي هتقعد لوحدها مع الوقت؟

حازم: إحنا موجودين معاها يا وعد، ومش هنسيبها. إحنا مش هنبعد عن بعض. ممكن وقتها نكون أربع شقق، لكن إحنا كلنا روحنا في بعض، والمكان عمره ما هيفرقنا. وإنتِ فاهمة كده كويس.

حسيت إني مش قادرة أجاري حازم في الكلام. عنده حل لكل حاجة، وكل ما أتكلم في مشكلة يرد عليا بحل، لكن أنا كنت لسه زي ما أنا، مترددة وتايهة، ومش عارفة أقرر إيه.

حازم: يلا يا وعد، مش عايزين نضيع بقية يومنا، وفي حد زعلان مني هناك.

هزيت راسي وقلت له:

وعد: حاضر يا حازم.

وفعلًا خرجنا، والمرة دي قعدت ما بين ياسين ومجد.

كان مجد قاعد ساكت، ومن الواضح إنه لسه متضايق من كلامي، فقررت أحاول أصالحه بطريقتي.

بدأت أهز رجله برجلي، فبصلي وسكت.

عملتها مرة تانية، فبصلي برضه من غير ما يتكلم.

ما كانش حد واخد باله في الأول، لكن مع تكرار حركاتي، بدأوا يلاحظوا ويبتسموا.

ولما هزيت رجله للمرة التالتة، وكانت أقوى من المرتين اللي فاتوا، بصلي وقال:

مجد: نعم؟ عايزة إيه؟

وعد: هو إنت بتتنرفز عليا ليه وبتكلمني كده؟ على العموم خلاص، هقوم من جنبك وما تكلمنيش.

لسه بتحرك عشان أقوم، لقيته مسكني من إيدي وقال:

مجد: طب اقعدي خلاص.

بصيت له وابتسمت، وقلت بمكر:

وعد: هو أنا لازم أتنرفز عشان تكلمني؟

ضحك وقال:

مجد: مجنونة!

وعد: سبتلك إنت العقل، إنت وحازم!

وبصيت لياسين وقلت له:

وعد: إنت سامع ابنك بيقول لي إيه؟

ياسين بص لمجد وقال له:

ياسين: دي وعد، دي ست العاقلين! هو إنت مش واخد بالك من حظك الحلو ونصيبك الجميل؟ دي وعد ليك إنت!

بصيت لياسين وأنا بضحك، وقلت له:

وعد: يا نصيبي إنت يا ياسين! أنا بحس كتير إن إنت الوحيد اللي ليا، مش ابنك ده!

بصلي وضحك، وفضلنا قاعدين مع بعض فترة طويلة، لحد ما اقترحنا نجيب فيلم ونتفرج عليه.

كان فيلم طويل، لكننا اندمجنا مع أحداثه، خصوصًا حكاية البطل والبطلة.

ومع تطور الأحداث، لقيت إنهم بيفارقوا بعض، وإن كل واحد فيهم ممكن يضطر يكمل حياته بعيد عن التاني.

بدأت أتأثر جدًا، وافتكرت حالي أنا ومجد.

*يا ترى ربنا كاتب لنا إيه؟ يا ترى فعلًا ممكن نفارق بعض؟*

غصب عني، عيني بدأت تنزل دموع، وما كنتش مستحملة أشوف لحظات الفراق اللي بينهم.

حازم بصلي، وفضل يضحك على تأثري، وقال:

حازم: في إيه يا وعد؟ كل ده مش حقيقة، ده خيال! ده فيلم! إنتِ ليه بتعيطي كده؟

وعد: عشان إنت ما عندكش إحساس ولا مشاعر!

حازم: وإنتِ هتفضلي كده لحد إمتى؟ طيب لو في الواقع، أنا بسيبك تتأثري وتعيطي على راحتك، لكن ده مش حقيقي!

بصيت له وسكت، لكن جوايا كان في كلام كتير نفسي أقوله.

*لو تعرف اللي جوايا يا حازم، لو تعرف إني مش بعيط على لحظات الفراق اللي في الفيلم وبس... أنا خايفة اللحظات دي تبقى حقيقة بيني وبين مجد. وساعتها مش دموعي بس اللي هتنزل، أنا حاسة إن قلبي نفسه هو اللي هينزف.*

فضلنا قاعدين مع بعض، لكن المرة دي حسيت إن التعب غلبني، وبدأت أغمض عيني واحدة واحدة، لحد ما ما بقيتش حاسة بأي حاجة حواليا.

ومع الوقت، راسي مالت على كتف مجد، ونمت بالفعل.

وأنا نايمة، لقيت نفسي بحوطه بدراعي، كأني فاكرة إنه حازم.

الغريب إني كنت حاسة براحة غريبة جدًا، وأمان أكبر بكتير من اللي كنت بحسه وأنا في حضن حازم، رغم إنه أخويا والإنسان اللي طول عمري باحتمي فيه.

في لحظة، فوقت من نومي، لكن فضلت مغمضة عيني ومتظاهرة إني لسه نايمة.

كنت فعلًا مسندة راسي على كتف مجد، ودراعي محاوطه، وكل ما أفكر في النارين اللي أنا بينهم، كنت أضمه ليا أكتر، وأنا مش عارفة أتصرف إزاي.

والأغرب إن مجد هو كمان حاوطني بقوة، وكأنه مش عايز يبعدني عنه.

وفجأة، شالني ودخل بيا الأوضة، ورقدني على سريري.

فتحت عيني للحظة، وبصيت في عينيه، كأني كنت عايزة أتملى من وشه قبل ما أغمض عيني تاني، وكأن آخر حاجة نفسي أشوفها هي ملامحه.

مجد بصلي وابتسم، وبعدها قرب مني وطبع قبلة على جبيني.

في اللحظة دي، حاوطت رقبته بدراعي وحضنته بقوة، وأنا لسه متظاهرة بالنوم.

وعد: أنا بحبك قوي يا مجد.

بمجرد ما قلت الجملة دي، حسيت إن ضربات قلبي بتزيد، وما قدرتش أقاوم نفسي أكتر.

فتحت عيني وحضنته فعلًا، المرة دي من غير ما أتظاهر بأي حاجة.

مجد بصلي، وحسيت إن ضربات قلبه هو كمان زادت، وإن جسمه ارتجف زيي بالضبط.

فضلنا في حضن بعض فترة طويلة، وكأن كل واحد فينا كان بيحاول يتمسك باللحظة دي لأطول وقت ممكن.

كانت دي أول مرة يدخل أوضتي بالشكل ده، وأول مرة أسمح لنفسي أعبّر له عن مشاعري من غير ما أهرب أو أرجع أخبيها.

لكن فجأة، سمعت صوت حازم.

الصوت ده كان كأنه فوقني من حلم جميل، فبصيت لمجد بسرعة، وطبعت قبلة على خده، وقلت له:

وعد: بحبك قوي يا مجد.

بصلي وسكت، وكان واضح عليه الذهول من كلامي ومن قربي منه بالشكل ده.

لكن أنا غمضت عيني تاني، وهو فضل باصص لي، مش مستوعب اللي حصل.

وفي اللحظة دي، دخل حازم.

لقى مجد قاعد جنبي وبيبص عليا، فبص له باستغراب وقال:

حازم: إيه اللي أخرك كده يا مجد؟ في إيه؟

مجد هز راسه وقال:

مجد: أبدًا.

وبعدها قام وخرج.

حازم بص له وقال بنبرة فيها تحذير:

حازم: وبعدين معاك؟ أنا مش عايز أقلب الوش التاني.

مجد سكت وما ردش عليه، لكن حازم ناداه تاني وقال له بهدوء:

حازم: مجد، ما تزعلش مني. هي بالنسبة لي مش أختي وبس.

مجد: أنا فاهم.

حازم: ما تزعلش، وإن شاء الله ربنا يجمعكم قريب.

مجد هز راسه وقال:

مجد: أستأذنك يا حازم، أنا كمان عايز أنام.

وفعلًا، سابهم ودخل أوضته، وهو سرحان في اللحظات الحلوة اللي عاشها معايا.

كل لحظة حلوة كانت بتفكره بلحظة تانية عاشناها مع بعض قبل كده، وكل ما يفتكر قربي منه وكلاي كان اشتياقه ليا بيزيد.

غمض عينيه، وهو مشتاق جدًا لحياتنا مع بعض، ومستني بفارغ الصبر اني أخلص امتحاناتي علشان نكون مع بعض في شقتنا، ونبدأ حياتنا اللي نفسه فيها من زمان.
تعليقات



<>