رواية مهرة في عرين القحطاني الفصل السادس والثلاثون36 بقلم اماني سيد

رواية مهرة في عرين القحطاني بقلم اماني سيد
  رواية مهرة في عرين القحطاني الفصل السادس والثلاثون36 بقلم اماني سيد
في صباح اليوم التالي، كان زيدان يستعد للخروج حين دخلت شاهندة الغرفة، فالتفت إليها وقال:
- شاهندة، عايزك تروحي تجيبي حاجتك من البيت.
نظرت إليه باستغراب:
- أجيب حاجتي ليه؟ إحنا هنروح فين؟
- إنتِ هتيجي تعيشي معايا هنا في بيت بابا، وأنا هسيب البيت اللي أهلك قاعدين فيه لحد ما يشوفوا لهم مكان تاني.
عقدت حاجبيها:
- يعني إيه؟ هنسيبهم هناك لوحدهم؟
- مش هنسيبهم لوحدهم، هما قاعدين في البيت  لحد ما يلاقوا شقة، لكن أنا مش مرتاح في وجودهم معايا، ومش حابب أختلط بأبوكى  في الفترة دي. محتاج أعيش في بيتي من غير ما أحس إن فيه حد بيراقبني انا بحاول انسى اللى فات 
حاولت شاهندة أن تتحدث:
- بس بابا وماما...
قاطعها بهدوء:
- أنا مش بطردهم يا شاهندة، ولا بطلب منك تقاطعيهم، هما يقعدوا في البيت براحتهم لحد ما يلاقوا مكان تاني، وإنتِ هتكوني معايا هنا. روحي هاتي حاجتك، وأنا هستناكي.

لم تجد شاهندة ما تقوله، فأومأت بالموافقة، ثم تحركت لتجهز نفسها.
وبعد وقت قصير، ذهبت إلى بيتها يقيم فيه أهلها، وجمعت بعض ملابسها وأغراضها الشخصية، وحين رآها عتمان تحمل الحقائب، سألها:
- إيه يا شاهندة؟ بتعملي إيه؟
ردت وهي تضع بعض الأشياء داخل حقيبتها:
- زيدان عايزني أروح أعيش معاه في بيت عمي، وهو هيسيبكم هنا لحد ما تلاقوا شقة تانية.
نظر إليها عتمان باستغراب:
- يعني هو مش عايزنا نقعد معاه؟
- هو مش واخد راحته وحاسس إنه كده هيكون مرتاح اكتر ، وعايز ياخد راحته في بيته.
تدخلت والدتها:
- طب وإحنا نعمل إيه دلوقتي؟ هنفضل قاعدين هنا لحد إمتى؟
- لحد ما تلاقوا شقة تانية يا ماما، زيدان مش هيطلب منكم تمشوا قبل ما تلاقوا مكان مناسب.

لم تزد شاهندة على ذلك، ولم تحاول أن تشرح لهم أكثر، فقد كانت تعرف أن زيدان اتخذ قراره ولن يتراجع عنه، كما أنها لم تكن تريد أن تدخل في نقاش قد يكشف توتر علاقتها به.
كان عز  يستمع إلى الحديث من مكانه، وقد بدا عليه الضيق، ثم قال فجأة:
- هو إحنا هنفضل كده كتير؟
التفت إليه عتمان:
- مالك يا عز ؟
- مالي؟ أنا زهقت من الوضع ده يا بابا. مرة نكون في السرايا، ومرة في بيت زيدان، ودلوقتي زيدان مش عايزنا نقعد معاه، فهنفضل ننقل من بيت لبيت لحد إمتى؟
رد عتمان بضيق:
- يا ابني كلها كام يوم وهنرجع السرايا تانى اصبر لما مهره تتجوز وأمينه مش هتعرف تعيش بعيد عنها وصفوان مش هيسيب شغله ويجيى يقعد هنا 
ـ  اصلا اننا نستنى اللى حضرتك بتقوله ده غلط خصوصا إن السؤايا نفسها مش بتاعتنا انت ليك فيها جزء . وبعدين إحنا كان لازم يكون عندنا بيت مستقل من الأول، أو على الأقل ما كناش جينا هنا غير وإحنا عندنا شقة تانية نرجع لها. أنا شايف إن اللي بيحصل ده كله غلط يا بابا.
قال عتمان محاولًا السيطرة على انفعاله:
- إنت عايزني أعمل إيه يعني؟ الظروف اتغيرت، واللي حصل حصل.
اقترب معتز منه وقال بحدة:
- إنت مش فقير يا بابا عشان ما تعرفش تجيب حتى شقة تكفينا! عندك فلوس، وعندك نصيب في الشركة، ومش معقول كل شوية نستنى حد يفتح لنا بيته أو يطلب مننا نمشي. إحنا مش عارفين نستقر في مكان، وكل واحد فينا بقى حاسس إنه ضيف عند غيره.
تدخلت والدته:
- خلاص يا عز ، مش وقته الكلام ده.

لكنه لم يتوقف:
- لأ يا ماما، لازم نتكلم. أنا مش فاهم ليه حياتنا كلها متعلقة ليه بابا مايعملش زى عمى جاسر ليه هو مجرد تابع ليه هو وابنه حتى لما بيحاول يستقل برضوا بيدور فى حلقه صفوان وجاسر وبصراحه كده الوضع ده مش عاجبنى 
نظر عتمان إلى ابنه بغضب، لكنه لم يجد إجابة مقنعة، خاصة أن كلام عز  لم يكن بعيدًا عن الحقيقة.
أما شاهندة، فأنهت ترتيب حقائبها، ثم قالت:
- أنا همشي دلوقتي، زيدان مستنيني.
غادرت وهي تحمل حقائبها، تاركة خلفها أجواء مشحونة، بينما ظل عز  واقفًا أمام والده ينتظر منه ردًا، لكنه لم يحصل إلا على صمت ثقيل.
ظل عز واقفًا أمام والده بعد خروج شاهندة، ثم سحب الكرسي وجلس قبالته، وقال بنبرة جادة:
- بص يا بابا، أنا عايز أتكلم معاك في موضوع مهم، وعايزك تسمعني للآخر قبل ما ترفض.
نظر إليه عتمان باستغراب:
- خير يا عز؟ فيه إيه؟
- أنا قربت أتخرج، وبدأت أفكر في مستقبلي، ومش عايز أستنى لما أخلص الكلية عشان أبدأ أدور على شغل. أنا عندي فكرة مشروع وعايز أنفذها.
ابتسم عتمان:
- مشروع إيه؟ إنت مش محتاج تشغل بالك بالحاجات دي دلوقتي، خلص كليتك الأول، وبعدها تيجي تشتغل معايا في الشركة، وأنا هتكلم مع صفوان يشوفلك مكان مناسب.
هز عز رأسه رافضًا:
- أنا مش عايز أشتغل في الشركة يا بابا، أنا عايز أفتح ورشة سيارات ومحل قطع غيار.
اختفت الابتسامة من وجه عتمان، ونظر إليه للحظات قبل أن يقول مستنكرًا:
- ورشة سيارات؟! إنت بتقول إيه يا عز؟ إنت داخل كلية هندسة عشان في الآخر تشتغل ميكانيكي؟ مش على آخر الزمن ابني يبقى ميكانيكي!
رد عز بهدوء:
- هو حضرتك شايف إن الشغلانة دي عيب؟
- أنا مش بقول إنها عيب، بس إنت مهندس يا ابني، ومكانك في شركة كبيرة،  وتبقى ليك قيمة ومكانة، مش تفتح ورشة وتقف وسط الصنايعية!
- وأنا شايف إن الورشة والمحل ممكن يكونوا مشروع ناجح جدًا، ومش معنى إني مهندس إني لازم أشتغل موظف في شركة. أنا درست المجال اللي بحبه واشتغلت فيه ، وعندي خبرة كويسة في العربيات، وعارف أنا عايز أعمل إيه.
رد عتمان بنفاد صبر:
- يا عز، أنا مش هسيبك تضيع مستقبلك في مشروع زي ده. هتشتغل في الشركة، وده قراري.
تغيرت ملامح عز وقال باعتراض:
- حضرتك بتقرر مستقبلي على أي أساس؟ أنا مش صغير، وقربت أتخرج، ومن حقي أختار المجال اللي عايز أشتغل فيه. وبعدين أنا مش جاي أطلب منك تمول المشروع كله، أنا شغال ومعايا مبلغ كويس جمعته بنفسي، وكل اللي محتاجه إنك تكمل لي على المبلغ ده عشان أبدأ.
- حتى لو معاك فلوس، أنا مش موافق على الفكرة من أساسها.
- طب اسمعني الأول. أنا مش عايز أبدأ من الصفر، أنا عايز أستغل البيت بتاعنا اللي في البلد هناك انت كده كده هتستقر هنا .
قطب عتمان حاجبيه:
- بيت إيه؟
- البيت اللي كنا عايشين فيه قبل ما نيجى هنا . المكان مناسب جدًا، وممكن أجهزه ويبقى ورشة في جزء منه ومحل قطع غيار في الجزء التاني. كده هنوفر الإيجار، وهقدر أبدأ من غير ما أحط كل فلوسي في تجهيز مكان جديد.
نظر إليه عتمان باندهاش:
- إنت عايز تقلب البيت ورشة ومحل؟!
- أيوه، وعايز حضرتك تسيبهولي أتصرف فيه، بدل ما هو مقفول ومحدش بيستفيد منه. وأنا هتكفل بتجهيزه وتشغيله، ومش هطلب منك غير إنك تكمل لي المبلغ الناقص.
- لأ يا عز، أنا مش موافق. البيت ده مش معمول عشان يبقى ورشة، وبعدين إنت لسه متخرجتش، ومستعجل على إيه؟
- أنا مش مستعجل، أنا بخطط. وعايز أبدأ وأنا لسه في آخر سنة، عشان لما أتخرج يكون عندي شغل قائم بالفعل. وبعدين أنا مش هفضل طول عمري مستني حضرتك تشوفلي فرصة في الشركة أو تتكلم مع صفوان عشان يشغلني.
قال عتمان بضيق:
- وإيه المشكلة لما تشتغل في الشركة؟ دي شركة العيلة، وإنت ليك فيها نصيب، ومش غريب عنها.
ضحك عز بسخرية:
- شركة العيلة؟ أنا طول عمري بعيد عن العيلة دي يا بابا. لا أنا عارفهم ولا هما يعرفوني، وعمري ما حسيت إن ليا مكان وسطهم. وبعدين حضرتك نفسك مش صاحب القرار فيها، هتروح تطلب من صفوان يشغلني، وهو اللي يوافق أو يرفض؟ أنا مش عايز أبدأ حياتي بالشكل ده.
- هو مايقدرش يرفض لانى ليه نصيب فيها 
- وأنا بتكلم عن مستقبلي. مش عايز أفضل مستني موافقة حد، ولا أبقى تابع لحد. أنا عايز أعمل حاجة تخصني، وأكبر فيها بمجهودي، ويبقى ليا اسمي وشغلي وفلوسي. وصدقني أنا واثق إني هنجح في المشروع ده أكتر ما ممكن أنجح وأنا قاعد في مكتب مستني حد يحدد لي شغلي.
ظل عتمان ينظر إليه بامتعاض، ثم قال:
- يعني إنت مصمم على الورشة والمحل ومش هتغير رأيك؟
- أيوه، ومش بطلب منك توافق على حاجة من غير ما تفهمها. أنا درست المشروع، وعارف تكلفته، وعارف هجيب البضاعة منين، وعندي مبلغ بدأت أجمعه من شغلي، ومحتاج منك تكملي الباقي وتسيبلي البيت. وكل اللي عايزه إنك تديني فرصة أبدأ حياتي بعيد عن مشاكل العيلة دي.
تنهد عتمان، وأشاح بوجهه قليلًا. لم يكن طلب عز سهلًا، لكنه في الوقت نفسه لم يكن يعرف كيف يرفضه دون أن يدخل معه في خلاف أكبر. كما أن فكرة ذهابه إلى صفوان ليطلب منه أن يستوعب ابنه في الشركة لم تكن مريحة له على الإطلاق، خاصة بعد كل ما حدث بينهما.
عاد ينظر إلى عز وقال:
- خلاص يا عز، أنا هساعدك، بس اعتبرها تجربة مؤقتة. هكمل لك المبلغ اللي ناقصك، والبيت هسيبهولك تجهزه زي ما إنت عايز، لكن عايزك تفهم إنك لو لقيت نفسك مش قادر تكمل، ساعتها هتيجي تشتغل في الشركة.
ابتسم عز براحة:
- أنا مش هحتاج أرجع في كلامي، وهتشوف بنفسك إن المشروع ده هينجح.
- ربنا يوفقك يا ابني، بس متنساش إن الشغل مش مجرد حماس وأفكار، محتاج إدارة وصبر.
- عارف، وعشان كده أنا بفكر فيه من فترة، ومش داخل الموضوع من غير حسابات.
نهض عز من مكانه وقد بدا عليه الحماس، وبدأ يتحدث عن المكان والتجهيزات التي يحتاج إليها، بينما ظل عتمان جالسًا يتابعه. وافق في النهاية، ولو مؤقتًا، لأنه لم يكن مستعدًا لأن يطلب من صفوان وظيفة لابنه، ولأنه أدرك أن عز لن يقبل أن يعيش التجربة التي عاشها هو، أو يظل متعلقًا بعائلة لم يشعر يومًا أنه واحد منها. 

مرّ اليومان التاليان بهدوء نسبي، وانشغل صفوان خلالهما بترتيبات زواجه من مهرة، إلى جانب متابعة أعمال الشركة والاستعداد للاجتماع الذي طلبه منه عدد من كبار التجار في البلد.
وفي صباح اليوم المحدد، وصل إلى السرايا التجار ، . رحّب بهم صفوان، ودعاهم للجلوس، ثم بدأ الحديث معهم عن أحوال السوق والتعاملات التجارية، وطلب من امينه والده مهره تحضر عزومه غداء للزوار  
وجلس معهم وبدأ فى الحديث وكان والده يجلس معه 
- اتفضلوا، أنا تحت أمركم. حضرتكم طلبتوا تقابلوني في موضوع مهم، وأنا سامعكم.
تبادل الرجال النظرات، ثم بدأ أحدهم الحديث:
- بص يا صفوان بيه، إحنا مش هنلف وندور عليك. إحنا جايين نطلب منك طلب، ويمكن يكون غريب شوية، بس إحنا شايفين إن مفيش حد غيرك يقدر يعمله.
ابتسم صفوان باهتمام:
- خير إن شاء الله، قول يا حاج.
- إحنا عايزينك تترشح لمجلس النواب في الانتخابات الجاية.
انعقد حاجبا صفوان بدهشة، ونظر إليهم للحظات قبل أن يضحك ضحكة قصيرة:
- أنا؟! أترشح لمجلس النواب؟ ليه بس؟ هو أنا ناقص وجع دماغ؟
ابتسم أحدهم وقال:
- إحنا عارفين إن عندك شغلك ومسؤولياتك، وعارفين إن السياسة ليها حسابات تانية، لكن البلد محتاجة حد زيك.
رد صفوان بهدوء:
- بس أنا مش موجود في البلد أصلًا، أغلب وقتي في القاهرة، ومش هقدر أسيب شغلي وأتفرغ للموضوع ده.
قاطعه رجل آخر:
- ودي بالذات مش مشكلة عندنا. إحنا مش بنطلب منك تسيب شغلك، إحنا بنطلب منك تمثلنا وتكون صوتنا قدام المسؤولين.
أراح صفوان ظهره إلى المقعد وقال:
- طيب، خلونا نتكلم بصراحة. إنتوا شايفين إن النائب الحالي مقصر؟
ضحك أحد التجار بسخرية:
- مقصر إيه بس؟ ده إحنا مش عارفين نوصل له أصلًا! لا بنشوفه، ولا بنعرف نكلمه، ولا فيه حاجة اتعملت للبلد من ساعة ما مسك. كل ما نحتاجه في موضوع يقولوا لنا هنتواصل معاه، وفي الآخر مفيش حاجة بتحصل.
وأضاف آخر:
- البلد عندها مشاكل كتير، من أول الخدمات والمرافق لحد فرص العمل، والشباب مش لاقية فرصة. وإحنا محتاجين حد يسمعنا ويتابع مطالبنا، مش حد يظهر وقت الانتخابات وبعدها يختفي.
استمع صفوان إليهم باهتمام، ثم قال:
- بس أنا برضه بعيد عن البلد، ودي حقيقة مش هقدر أنكرها.
رد أحدهم سريعًا:
- صحيح إنت مش بتجيلنا كتير، لكن ده مش معناه إنك بعيد عننا. إنت بتتواصل معانا باستمرار، وأي حد من البلد بيحتاجك بيلاقي طريقة يوصلك بيها.
هز صفوان رأسه وقال:
- أنا فعلًا مش موجود هنا طول الوقت، لكن عمري ما قطعت علاقتي بالبلد. أنا بتابع كل حاجة بتحصل، وبكلم ناس كتير من أهلها، وأي مشكلة بتوصل لي بحاول أساعد في حلها على قد ما أقدر. وبعدين أغلب شباب البلد شغالين في شركاتنا، وده مش منّة مننا على حد، دي فرص عمل إحنا بنوفرها لأننا محتاجين شباب البلد وعايزينهم يشتغلوا ويكبروا.
قال أحد التجار:
- وده اللي مخلينا شايفين إنك الأنسب. إنت مش محتاج المنصب عشان تبقى معروف، ولا محتاجه عشان تحقق مصلحة لنفسك. إنت عندك شغلك واسمك ومكانتك، لكن البلد محتاجة تستفيد من وجودك أكتر.
وأضاف آخر:
- وإحنا مش عايزينك تبقى مجرد نائب بنشوف صورته على اللافتات. إحنا عايزين حد نقدر نروح له ونحط مشاكلنا قدامه، وحد يكون عنده قدرة يتابع ويضغط لحد ما يوصل لحل.
ابتسم صفوان وقال:
- أنا مقدّر ثقتكم جدًا، لكن الموضوع مش بالسهولة دي. الترشح مسؤولية كبيرة، ومش مجرد اسم يتحط في الانتخابات. لازم أكون مقتنع إني هقدر أدي الناس حقها من وقتي ومجهودي.
قال أكبرهم سنًا:
- وإحنا مش مستعجلين على ردك، بس فكر في الموضوع كويس. إحنا هنكون أول ناس تقف جنبك، ومش هنبخل عليك بأي دعم، والبلد كلها نفسها تشوف حد يمثلها بجد.
أومأ صفوان بتفكير، ثم قال:
- أنا هفكر في كلامكم، ومش هديكم وعد قبل ما أدرس الموضوع من كل جوانبه. ولو وصلت لقرار، هبلغكم بنفسي.
نهض الرجال، وصافحوه واحدًا تلو الآخر، وقبل خروجهم قال أحدهم:
- إحنا مستنيين منك خبر يفرحنا يا صفوان بيه، ومتنساش إن البلد دي ليها حق عليك، وإنت من أهلها مهما بعدت.
ابتسم صفوان:
- البلد وأهلها على راسي، وده عمره ما هيتغير.

انتهى المجلس واصر حاسر وصفوان على ضيافتهم وبعدها غادروا 
وبعد مغادرتهم، عاد إلى مقعده وظل يفكر في حديثهم. لم يكن يتوقع أن يأتيه طلب كهذا، ولم يكن قد وضع الترشح لمجلس النواب ضمن حساباته من قبل، لكن فكرة أن يكون له دور أكبر في خدمة أهل البلد لم تكن بعيدة عن اهتمامه.

تناول هاتفه، وفتح قائمة اتصالاته، ثم توقف عند اسم والده جاسر. تردد قليلًا قبل أن يترك الهاتف جانبًا، فقد أراد أولًا أن يفكر بهدوء في الأمر، ويعرف إن كان مستعدًا لتحمل مسؤولية جديدة بهذا الحجم، أم أن حياته المزدحمة بالفعل لا تحتمل مسؤولية أخرى.
تفتكروا هيوافق والافضل لصفوان هيفضل فى البلد ولا يرجع القاهره ؟؟
هل شاهنده هترجع لجلباب عتمان ولا هتدخل فى عباءه زيدان ؟؟
وايه رايكم فى عز ؟؟
وهى شاهنده تستحق فرصه اخرى 

تعليقات



<>