رواية نقطة عمياء الفصل السادس عشر بقلم منة احمد
ندي: معرفش، بس أرجوك الحقها قبل ما يحصلها حاجة!
عند معتز...
كان معتز واقف في أوضة العمليات، ومركز بكل حواسه مع المريض، وحواليه فريق التمريض بيساعده. كل حاجة كانت ماشية بشكل طبيعي، لحد ما عقله فجأة سابه وراح لمكان تاني خالص... عند نسمة.
نسمة اللي بعد ساعات هتبقى خطيبة أخوه آدم رسميًا!
غمّض عينيه للحظة، وكأن الفكرة نفسها كانت أكبر من قدرته على الاستيعاب. إزاي البنت اللي حبها من كل قلبه هتبقى لواحد غيره؟ وإزاي أخوه هو اللي هياخد مكانه في حياتها؟ افتكر أول مرة حس فيها إنه محتاجها، وافتكر اللحظة الوحيدة اللي اعترفوا فيها لبعض بحبهم، لما كانوا فاكرين إنهم ممكن يخسروا حياتهم. كان فاكر إن بعد اللحظة دي كل حاجة هتتغير، وإنه أخيرًا لقى حاجة حلوة يتمسك بيها... لكنه بقسوته وغروره كان السبب في إنها تبعد عنه كان نفسه حياته تتحسن، نفسه يلاقي حد يطمنه ويختاره من غير ما يخاف منه، لكن كل مرة كان بيقرب من حاجة حلوة، كان بيخسرها بإيده، ويرجع لنفس نقطة الضعف اللي بيحاول طول عمره يخبيها.
رجع معتز بعينه للمريض، لكن شروده كان غلبه، وفي لحظة ارتكب خطأ أثناء العملية تسبب في حدوث نز..يف مفاجئ.
ممرضة بفزع: دكتور معتز! في نز...يف!
اتجمد معتز مكانه، والأداة اللي كانت في إيده وقعت على الأرض بصوت خلّى الكل يبص ناحيته.
ممرض بسرعة: دكتور، لازم نتصرف فورًا! الحالة بتتدهور!
معتز بارتباك: إيه.. اللي حصل؟!
الممرضة: النز...يف بيزيد يا دكتور، ركز معانا!
بص معتز للمريض، وبعدها نزل بعينه لإيده، وبدأت صوابعه ترتعش. كان سامع أصوات اللي حواليه، لكن الكلام بيوصله كأنه جاي من مكان بعيد. كل اللي شايفه قدامه هو الد.م... الد..م اللي رجّعه فجأة لذكرى عمره ما قدر ينساها.
ممرض بحدة: دكتور معتز! حضرتك سامعني؟ المريض حالته خطيرة!
لكن معتز كان غارق في ذكرى تانية تمامًا.
افتكر نسمة وهي واقعة قدامه، والد..م اللي كان على إيده وقتها، وملامحها وهي بين الحياة والمو..ت. افتكر إنه كان السبب في وجعها، وإنه في لحظة غضب وقسوة كان ممكن يخسرها للأبد.
ممرض وهو بيهزه من كتفه: دكتور! فوق معانا، إحنا محتاجينك!
رفع معتز عينه ببطء، وملامحه كانت ثابتة بشكل غريب، لكن عيونه بدأت تحمر.
ممرض تاني بقلق: لازم نستدعي دكتور تاني يكمل مكانه، المريض مش مستحمل تأخير!
وبالفعل، خرج أحد الممرضين بسرعة يستدعي طبيبًا آخر، وبعد لحظات دخل الطبيب واستغرب لما لقى معتز واقف مكانه، مش بيتحرك، وباصص لإيده كأنه مش شايف حد حواليه.
الطبيب بقلق وهو بيمسك دراعه: معتز! إنت سامعني؟ بصلي!
رفع معتز عينه وبصله، من غير أي تعبير واضح على وشه.
الطبيب: إنت مش في حالتك، سيبلي العملية وأنا هكمل. بس لازم تفوق وتخرج ترتاح، فاهمني؟
معتز بصوت واطي: كمّل إنت... أنا مش قادر أكمل.
الطبيب: حاضر، بس اخرج دلوقتي، وسيب الباقي علينا.
خرج معتز من أوضة العمليات بخطوات تقيلة، وساب وراه حالة طارئة كان المفروض يكون هو أول واحد يقدر يتعامل معاها. دخل مكتبه، وخلع ملابس الجراحة ورماها بعيد، وبعدها وقف قدام المكتب وحط إيديه على دماغه.
معتز بصوت مبحوح: ليه يا نسمة؟ ليه وصلنا لكده؟ أنا حبيتك... بس معرفتش أحافظ عليكي. دلوقتي هتكوني لآدم... أخويا
نزلت دموعه، وحاول يمسحها بعصبية.
معتز: أنا مش عايزك تبقي لآدم... مش قادر أتخيلك معاه، ولا قادر أستوعب إنه هو اللي هياخدك مني. أنا اللي حبيتك، أنا اللي كنت عايزك تفضلي جنبي!
بدأ نفسه يتسارع بجنون. الدنيا بقت ضيقة عليه وكأن الجدران بتطبق على صدره، وحس إن مش قادر يستوعب الهوا. افتكر مواقف قديمة ووجع حاول يد..فنه سنين، وكل الذكريات رجعت تهاجمه في وقت واحد و فتح زراير من قميصه بسرعة، وهو بيحاول يدخل الهوا لرئتيه، وعيونه بتزوغ في المكان من شدة الهلع.
اتجه لدولاب الأدوية، وفتحه بعصبية، وطلع منه حقنـ..تين مهدئه، وبعدها دخل الحمام بسرعة ووقف قدام المراية وبص لنفسه، وشاف قد إيه هو ضعيف ومكسـ.ور. جـ..ن جنو..نه من منظره، وضر..ب المراية بإيده بكل قوته كذا مرة، لحد ما الإزا..ز اتكسـ..ر وإيده اتعو..رت ونزل منها الد..م بغزارة.
قعد على قاعدة الحمام، والحقـ..نتين جنبه، وإيده المصابة بتترعش. كان بيعيط بوجع صامت، لحد ما مد إيده ناحية الحـ..قنة الأولى وأخدها في لحظة تهور، وكأنه مش فارق معاه يحصل له إيه وشهق معتز، وغمّض عينيه بقوة، ودموعه نازلة على وشه. للحظات حس إن جسمه مش قادر يستحمل، لكن الوجع اللي جواه مكنش بيهدى. بالعكس، ذكرياته المؤلمة فضلت تقتحم دماغه بلا رحمة.
وبعدها بص للتانية بعينين مليانين يأس، وكأنه فقد تمامًا قدرته على التفكير في عواقب تصرفاته وقال بصوت مبحوح: أنا تعبت... مش قادر أستحمل أكتر من كده حتي الوجع مش مخليني انسي حاجه!
وبعد لحظات، استخدم الحـ..قنة التانية، ثم فضل قاعد مكانه، دموعه بتنزل وأنفاسه مضطربة. كان مستني الوجع اللي جواه يهدى، لكن ذكرياته فضلت تهاجمه، وملامح نسمة مش راضية تفارق خياله.
حاول يقوم، لكنه كان مترنح ومش قادر يثبت على رجليه. خرج من الحمام وفتح الدرج، وطلع علبة أقراص، وتصرف بتهور مرة تانية. وشرب ورمى إزازة الماية من إيده، ومسح على شفايفه بعنـ..ف، وصد..ره بيعلى ويوطى، وأنفاسه خارجة بصعوبة كأنه بيغرق.
وقعت عينه على إيده اللي لسه بتنـز..ف، فجاب شاش ولفه حوالين الجرح بعشوائية، من غير ما يهتم ينضفه أو يعالجه.
فضل واقف للحظات، مستند على المكتب، ووشه شاحب وعيونه حمرا. كان جسمه بيعلن استسلامه، لكن عقله لسه محبوس في نفس الدوامة وفجأة رن موبايله...
بص للشاشة، ولقى اسم مرات أبوه. رد، لكنه فضل ساكت.
مرات أبوه بقلق: معتز؟ إنت فين يا ابني؟ الناس وصلت الفيلا من بدري، وأنا وأبوك مش عارفين نعمل إيه! آدم وخطيبته لسه مجوش، والكل بيسأل عليهم. إنت كمان مختفي ومش بترد، في إيه؟!
غمّض معتز عينيه بقوة، وكأن مجرد سماع كلمة خطيبته مع اسم آدم كان كفاية يفتح جرحه من جديد.
مرات أبوه: معتز؟ إنت معايا؟!
بلع ريقه، وحاول يخفي التعب اللي في صوته وقال بثبات مصطنع: أنا جاي.
مرات أبوه: طيب يا حبيبي، تعالى بسرعة، أبوك مستنيك.
قفل معتز المكالمة من غير ما يرد. وقف للحظات، وبعدها خد الجاكيت ولبسه بصعوبة. كان جسمه همدان، ورجليه مش شايلينه كويس، لكنه أصر إنه يخرج.
غادر المستشفى واتجه لعربيته، ركب وقعد سند ضهره شوية، عينه ثابتة على الطريق قدامه. وبعد لحظات اتحرك ناحية الفيلا، وهو مش عارف إزاي هيقدر يقف قدام آدم ونسمة في نفس المكان.
في الطريق...
كانت نسمة قاعدة جنب الست اللي كانت فاكره إنها أمها، وعينيها بتتنقل بين الطريق والست اللي جنبها. من ساعة ما خرجوا وهي بتحاول تعرف هما رايحين فين، لكن الست كانت رافضة تقول أي تفاصيل، وده زوّد قلقها وحيرتها.
نسمة بقلق: إحنا رايحين فين بالظبط؟ وإنتي ليه مش عايزة تقوليلي أي تفاصيل؟!
الأم بهدوء بارد: اصبري شوية، وهتعرفي كل حاجة لما نوصل.
نسمة بضيق: أنا مش فاهمة إنتي عايزة توصلي لإيه. بعد السنين دي كلها تظهري فجأة وتقوليلي إنك هتعرفيني على أهلي؟ إيه اللي يضمنلي إنك مش بتكدبي عليّا للمرة التانية؟
الأم: مفيش حاجة هتضمنلك غير الحقيقة اللي هتشوفيها بعينك.
بصت نسمة من الشباك وهي بتحاول تركز في الطريق، وبعد شوية بدأت تلاحظ إن العربية دخلت منطقة مألوفة بالنسبة لها. فضلت تتابع الشوارع لحد ما اتأكدت إنها عارفة المكان كويس، فالتفتت للست باستغراب: استني... إحنا فين؟ أنا عارفة المنطقة دي!
الأم من غير ما تبصلها: كويس إنك عارفاها، يبقى مش هتتعبي في معرفة العنوان.
رجعت نسمة تبص من الشباك، وبدأ القلق يزيد جواها كل ما العربية تقرب من وجهتها. لحد ما وقفت أخيرًا قدام فيلا عزام، والد معتز وآدم.
اتسعت عيني نسمة، وبصت للفيلا بصدمة، وبعدها التفتت للست بسرعة باستغراب: إيه ده؟! إنتي جايباني فيلا عزام ليه؟!
الأم بهدوء: انزلي يا نسمة.
نسمة بعدم تصديق: أنزل إيه؟! إنتي مش قولتي إنك هتوديني لأهلي؟ إيه اللي جابنا هنا؟! دي الفيلا اللي هتتعمل فيها خطوبتي النهارده!
الأم: عارفة.
نسمة بصدمة أكبر: عارفة؟! أمال إنتي جايباني هنا ليه؟ وإزاي عرفتي أصلًا إن خطوبتي هتكون في المكان ده؟!
الأم بنبرة حاسمة: كل أسئلتك هتلاقي إجابتها جوا. انزلي بدل ما نفضل واقفين هنا.
فضلت نسمة باصة لها للحظات، بتحاول تفهم إذا كانت الست بتخفي عنها حاجة، ولا فعلًا فيه سبب لوجودهم هنا.
نزلت الست من العربية بتوتر، ونسمة وراها، ووقفت قدام الفيلا بتفرك إيديها من التوتر. كان جزء منها متحمس يعرف مين أهلها الحقيقيين، لكن وجودها قدام فيلا عزام تحديدًا خلّاها تحس إن فيه حاجة مش طبيعية.
اتقدمت الست ناحية الباب وخبطت، وبعد لحظات فتح أحد العاملين بالفيلا باستغراب: أيوه يا فندم، حضرتك عايزة مين؟
الست بثقة: عايزة أقابل صاحب البيت، عزام بيه.
العامل: ممكن أعرف حضرتك مين أو عايزة تقابليه بخصوص إيه؟
الست بحسم: الموضوع مهم، ولازم أقابله بنفسي.
العامل طلب منها تنتظر لحظة، وبعدها اتجه للداخل ناحية عزام، اللي كان واقف بيتابع تجهيزات الخطوبة وسط المعازيم.
العامل: فيه ست غريبة بره يا فندم، مصممة تقابل حضرتك، وبتقول إن الموضوع مهم ومينفعش تستنى.
عزام باستغراب: ست مين؟ وعايزة إيه؟
العامل: مش راضية تقول يا فندم، بس مصممة تقابل حضرتك بنفسها.
عزام عقد حاجبيه باستغراب، وبعد لحظات قاله: طيب، دخلها.
رجع العامل ناحية الباب، وسمح للست بالدخول. دخلت الست بخطوات واثقة، ونسمة وراها بخطوات مترددة. أول ما دخلت، لقت الفيلا مليانة ناس، والكل بيتحرك استعدادًا للخطوبة، ففضلت واقفة عند المدخل بتبص حواليها بقلق، وعينيها بتدور في المكان. كانت مش فاهمة إيه علاقة أهلها الحقيقيين بعيلة عزام، ولا ليه الست اختارت تيجي بيها هنا بالذات، وفي يوم خطوبتها كمان.
نسمة بصوت منخفض وهي بتلحق الست: إنتي جايباني وسط الناس دي ليه؟ أنا عايزة أفهم! إحنا المفروض رايحين نقابل أهلي، مش جايين نحضر خطوبتي!
لكن الست ما ردتش، واكتفت إنها تبصلها نظرة غامضة، وبعدها كملت طريقها للداخل، لحد ما وصلت لعزام.
وبعد شوية دخلت الست، وبمجرد ما عينه وقعت عليها، ملامحه اتغيرت تمامًا و بصدمة: إنتي؟!
الست بابتسامة باردة: أيوه يا عزام... أنا.
عزام بص لها بعدم تصديق، لكن عينيه اتحركت ناحية البنت اللي واقفة جنبها، واتسعت عينيه أكتر لما عرفها وقال باستغراب: نسمة؟! إنتي إيه اللي جابك مع الست دي؟!
نسمة كانت واقفة مش فاهمة حاجة، وبصت له بتوتر: أنا مش فاهمة حاجة يا عمو عزام... هي اللي جابتني وقالتلي إنها هتعرفني على أمي وأهلي الحقيقيين.
عزام رجع بص للست بحدة: اهلك الحقيقين وايه علاقه نسمه؟ انطقي ايه الكلام اللي بتقوله ده؟!
الست بهدوء: مش هينفع نتكلم هنا وسط الناس. عندك مكان نقعد فيه؟
عزام فضل باصصلها بغضب، وبعدها أشار ناحية المكتب: اتفضلي ورايا.
دخل عزام المكتب، والست دخلت وراه ومعاها نسمة، وبعدها قفل الباب. نسمة كانت ماشية وهي مش مرتاحة، وكل اللي شاغلها إنها تعرف حقيقة الست دي وعلاقتها بيها.
عزام بحدة: اتكلمي... إنتي عايزة إيه؟
الست: قبل ما أتكلم، عايزة خديجة تكون موجودة.
عزام باستغراب: خديجة؟! وإيه دخل خديجة بالموضوع؟
الست: نادي عليها، وهتفهم كل حاجة.
عزام خرج من المكتب وطلب من واحدة من العاملات تنادي خديجة، وبعد دقايق رجع ومعاه خديجة.
خديجة دخلت وهي بتبص للست باستغراب وصدمة، لكن أول ما عينيها وقعت على نسمة، وقفت مكانها : ايه ده يا نسمه انتي ليه واقفه مع الست دي؟!
نسمة بصتلها بتوتر، ومقدرتش ترد.
خديجة وهي بتبص للست: إنتي إيه اللي جابك هنا؟ وإيه علاقتك بنسمة؟
الست: اقعدي يا خديجة... عندنا كلام لازم تعرفيه.
خديجة بحدة: أنا مش هقعد قبل ما أفهم إيه اللي بيحصل! نسمة واقفة معاكي ليه؟!
نسمة بتوتر: أنا كمان مش فاهمة... هي قالتلي إنها هتعرفني على أمي الحقيقية، وأنا جيت معاها عشان أعرف الحقيقة.
خديجة بصت للست بصدمة: أمها الحقيقية؟! إنتي بتقولي إيه؟!
الست بصت لنسمة، وبعدها رجعت بصت لخديجة: عايزه تعرفي بنتك مين ؟!!
خديجة بلعت ريقها، وبصتلها بتوتر وهي مش فاهمة قصدها: مين بنتي؟!
الست أشارت ناحية نسمة، وقالت بثقة: دي بنتك يا خديجة... نسمة بنتك اللي فضلتي سنين تدوري عليها!.
سكت المكان تمامًا، وخديجة فضلت باصة لها من غير ما تستوعب كلامها وقالت بصوت مهزوز: إنتي... إنتي بتقولي إيه؟!
الست: بقولك إن نسمة بنتك، وإنها البنت اللي اتخطفت منك وهي عندها أربع سنين.
نسمة اتسمرت مكانها، وبصت للست بصدمة: إنتي بتقولي إيه؟! بنتها إزاي؟!
خديجة رجعت خطوة لورا، وحطت إيدها على صدرها: لا... مستحيل! إنتي بتكدبي!
عزام بحدة: إنتي بتقولي إيه؟! وإيه اللي يثبت الكلام ده؟!
الست: العلامة اللي في ضهرها... خديجة أكيد فاكرة العلامة اللي كانت عند بنتها.
خديجة بصت لنسمة، وملامحها بدأت تتغير وقالت بصوت منخفض: العلامة...
نسمة بصتلها باستغراب وبذهول : علامة إيه؟ أنا مش فاهمة حاجة!
الست قربت من نسمة وشدت جزء من قماش فستانها من الخلف.
نسمة بخوف: إنتي بتعملي إيه؟! ابعدي عني!
خديجة قربت بسرعة، وعينيها وقعت على العلامة الموجودة في ضهر نسمة. فضلت واقفة مكانها، ودموعها بدأت تنزل وهي بتتأكد إنها نفس العلامة اللي كانت في ضهر بنتها الصغيرة وقالت بصوت مبحوح: دي... دي نفس العلامة!
نسمة بارتباك: علامه ايه ؟!! وإنتي بتعيطي ليه؟! هو إيه اللي بيحصل؟!
خديجة مدت إيدها ناحيتها، ودموعها بتنزل بغزارة: بنتي... إنتي بنتي يا نسمة!
نسمة هزت راسها بعدم تصديق: لا... لا، أنا مش فاهمة! إنتي بتقولي إيه؟!
خديجة وهي بتحاول تقرب منها: أنا أمك يا حبيبتي... والله العظيم أنا أمك.
نسمة انهارت، وهزت راسها بعنف والدموع مغرقة وشها وقالت بصوت مكسور: إنتوا كلكوا كدابين! إنتوا شايفني لعبة في إيدكم؟ كل شوية تطلعولي بحقيقة جديدة وتستنوا مني أصدقكم؟!
الست ببرود: مش إنتي عايزة تعرفي أمك مين؟ أهي قدامك... دي أمك الحقيقية يا نسمة.
نسمة بصريخ: ليه عملتي فيا كده؟! أنا عملتلك إيه عشان تحرميني من أمي وأهلي وتضيعي عمري بالشكل ده؟!
رجليها ماقدرتش تشيلها، فوقعت على الأرض وانهارت في العياط وخديجة نزلت لمستواها بسرعة واحتضنتها بقوة خديجة بعياط: اهدي يا حبيبتي... أنا أمك والله. فضلت سنين بدور عليكي، وعمري ما فقدت الأمل إني ألاقيكي. أنا كمان اتحرمت منك، ومكنش ليا ذنب في اللي حصل.
نسمة فضلت تعيط في حضنها، ومتشبثة بيها كأنها خايفة تفقدها هي كمان وقالت بصوت متقطع: طب لو أنا بنتك، إنتي سيبتيني ليه؟ ليه مدورتيش عليا؟ كنتي فين كل السنين دي؟!
خديجة بعدت وحطت إيدها على بقها وهي بتعيط: أنا مسيبتكيش يا بنتي! أنا دورت عليكي في كل مكان، سألت في المستشفيات وأقسام الشرطة، وفضلت سنين بدور عليكي. عمري ما بطلت أدور، ولا يوم واحد فقدت الأمل إني أشوفك تاني.
نسمة: بس أنا معرفكيش... أنا عمري ما شوفتك ولا فاكرة أي حاجة عنك!
خديجة: عارفة يا حبيبتي... إنتي كنتي صغيرة أوي لما اختفيتي، كان عندك أربع سنين. بس أنا فاكرة كل حاجة عنك، فاكرة ضحكتك وشكلك وكل تفاصيلك وانتي صغيره.
نسمة فضلت باصة لخديجة والدموع بتنزل من عينيها وقالت بصوت ضعيف: يعني... يعني إنتي فعلًا أمي؟... أنا كنت بدور على إجابة ومكنتش أعرف إنك قريبة مني بالشكل ده!
خديجه حضنتها تاني، وفضلت تعيط وهي بتضمها ليها. بانهيار: أيوه يا حبيبتي... أنا أمك. أنا أمك اللي فضلت سنين مستنياكي.
نسمة سكتت شوية، وبعدت راسها عن حضن خديجة، ورفعت عينيها تبصلها وسط دموعها. خديجة مسكت وشها بحنية، ومسحت دموعها بإبهامها، وبعدها باست راسها وقالت بصوت مليان حنان: خلاص يا حبيبتي... إنتي رجعتيلي، ومش هسيبك تاني أبدًا.
عزام كان واقف بيتابع المشهد وعينيه مليانة غضب، وبعدها لف ناحية الست.
عزام بحدة: يعني إنتي اللي خطفتي بنت خديجة؟!
الست ببرود: أيوه، أنا اللي خدتها.
عزام بصدمة وغضب: وإنتي بتعترفي بكل بساطة كده؟!
الست: أيوه. أنا كنت عايزة أوجعكم زي ما وجعتوني.
خديجة بعدت عن نسمة وبصتلها بغضب شديد: ليه؟! عملتلك إيه بنتي؟! دي كانت طفلة ! إزاي قلبك طاوعك تخطفيها وتحرميها مني كل السنين دي؟!
الست: عشان تعرفي يعني إيه حد يتاخد منه أغلى حاجة عنده! عشان تدوقي نفس الوجع اللي أنا دوقته لما عزام طردني وحرمني من ولادي!
خديجة بوجع: يعني انتقمتي مني في بنتي اللي هي مش بنت عزام؟! دي طفلة ملهاش ذنب في أي حاجة! إنتي عارفة أنا عشت السنين دي إزاي؟! كنت كل يوم بصحى على أمل ألاقيها، وكل يوم أنام وأنا مش عارفة هي عايشة ولا ماتت!
الست بغيظ: ما إنتي مراته يا خديجة! مش فارق معايا هي بنت مين، المهم إنكم اتحرقتوا زي ما أنا اتحرقت!
خديجة بغضب: إنتي مفيش في قلبك رحمة! إنتي حرمتيني من بنتي، وحرمتيها من إنها تعرف أمها وتعيش وسط أهلها!
عزام كان واقف ساكت، لكنه كان بيبصلها بغضب واضح، وبعدها اتكلم: وإنتي لسه بتتكلمي عن إننا حرمناكي من ولادك؟! نسيتي إنتي عملتي إيه زمان؟!
الست بغيظ: أيوه، إنت اللي حرمتني منهم! إنت اللي طلعتني من حياتهم وخدتهم مني!
عزام بسخرية: أنا اللي حرمتك؟! إنتي اللي خنـ..تيني مع واحد غريب، وكنتي بتدخليه بيتي في غيابي!
الست بصوت عالي: أنا خنـ..تك عشان إنت كنت سايبني لوحدي طول الوقت! كنت بتسافر وتغيب بالأيام، ومكنتش حاسة إن ليا زوج ولا حياة!
عزام بغضب: يعني كنت بسيبك بمزاجي؟! أنا كنت بتعب وبشقى عشان أوفرلك إنتي والولاد حياة كويسة! ولو كنتي حاسة بالوحدة، كان ممكن تتكلمي معايا، مش تخونيني وتدخلي راجل غريب بيتي!
الست بدموع: إنت عمرك ما فهمتني يا عزام... كنت محتاجة وجودك جنبي، مش فلوسك وبس!
عزام بحدة: وده يديكي الحق تخوني؟! وتدخلي راجل غريب على ولادك؟! كان قدامك ألف طريقة غير الخيانة، لكن إنتِ اخترتي تدمري بيتك بإيدك!
الست: أنا غلطت، بس إنت كمان مش بريء! إنت اللي وصلتني لكده!
عزام: متحاوليش ترمي غلطك عليا. أنا عمري ما قصرت معاكي في حاجة، ولو كنتي شايفة إني مقصر، كان ليكي ألف طريقة تتصرفي بيها غير الخيانة!
عزام سكت لحظة، وبعدها ملامحه اتغيرت، وصوته بقى مليان غضب: بس خيانتك لوحدها مكنتش أكبر مصيبة عملتيها... إنتي كمان سمحتي للكـ..لب بتاعك يعذ..ب ابنك عشان يسكت وميفضـ..حش خيا...نتكم!
الست بارتباك: إنت بتقول إيه؟!
عزام: متعمليش نفسك مش فاهمة! معتز شافك مع الراجل ده، ولما عرف إنه ممكن يقولّي على اللي شافه، حبسه في الأوضة وعذ..به وهدده عشان ميتكلمش!
الست بإنكار: إنت بتألف الكلام ده!
عزام بغضب: بألف؟! أنا مكنتش أعرف أي حاجة عن اللي حصل غير لما رجعت من السفر، وابني بنفسه حكى لي كل حاجة! حكى لي إنه شافك مع الراجل ده، وإنه حبسه وعذبه عشان يسكت، وإنه كان بيهدده كل ما يحاول يتكلم!
الست بتوتر: أنا...
عزام مقاطعًا: أيوه، إنتي! إنتي كنتي عارفة وساكتة! كنتي شايفة ابنك بيتعذ..ب قدامك، وكل اللي كان شاغلك إن محدش يعرف إنك بتخو..نيني!
الست وهي بتحاول تدافع عن نفسها: إنت مش فاهم حاجة! هو كان بيقولي إن معتز لازم يتعلم ميتدخلش في اللي ميخصوش، وكان بيخليني أسكت ومتكلمش!
عزام بصدمة وغضب: يعني كنتي عارفة؟! كنتي عارفة إنه بيحبس ابنك وبيعذ..به، وسايباه يعمل فيه كده؟!
الست: أنا مكنتش عارفة أعمل إيه... هو كان بيهددني، وكنت خايفة كل حاجة تتكشف!
عزام بغضب: خوفتي على نفسك وفضيحتك، ومخفتيش على ابنك؟! ده كان طفل عنده سبع سنين! رجعت من السفر لقيته مريض وبيترعش من الخوف، ولما حكالي اللي حصل، عرفت إن ابني كان بيتعذ..ب وهو في بيته وإنتي شايفة وساكتة!
الست بدموع: أنا مكنتش عايزة أوصل الأمور لكده...
عزام بوجع: بس وصلتيها! معتز من يومها اتغير، بقى خايف من الناس ومش قادر يثق في حد، وكل ما حد يقرب منه كان بيرجع يفتكر اللي حصله. إنتي مش بس خنتـ..يني، إنتي كسـ..رتي ابنك وهو لسه طفل، وبدل ما تكوني أمانه، كنتي جزء من خوفه!
الست: أنا كنت عايزة ولادي يفضلوا معايا!
عزام بغضب: اللي تسيب ابنها يتعذ..ب عشان تخبي خيا..نتها، متتكلمش عن الأمومة! أنا طلقتك وخدت الولاد بالقانون عشان أحميهم، وإنتي اللي ضيعتيهم من إيدك!
نسمة كانت واقفة ساكتة، بتسمع الكلام بصدمة، وكل كلمة عزام بيقولها كانت بتخليها تفكر في حاجات كتير حصلت قدامها قبل كده ورفعت عينيها ناحية الست، وصوتها خرج متردد: ثواني هو اللي قاله ده صح انتي ام معتز ودمرتيه كمان؟!
الست بصتلها من غير ما ترد.
نسمة بصدمة وغضب: انطقي إنتي... إنتي أم معتز وآدم؟!
الست ببرود: أيوه، أنا أمهم.
نسمة اتسمرت مكانها، وعينيها اتسعت وهي بتحاول تستوعب إن الست اللي قدامها هي أم معتز وآدم.
افتكرت موقف المطعم، لما معتز فجأة تعب وبقى مش قادر ياخد نفسه، وكانت ملامحه وقتها مليانة خوف ووجع، وهي فضلت واقفة مش فاهمة إيه اللي بيحصل له.
رجعت تبص للست، وبعدها بصت لعزام، وبدأت تربط بين اللي سمعته عن طفولة معتز وبين اللي شافته منه بنفسها.
كانت عايزة تسأل وتفهم أكتر، لكن الصدمة كانت أكبر من إنها تعرف تنطق بكلمة.
نسمة بصوت مرتعش وغضب: يعني كل اللي حصل لمعتز كان بسببها؟! انتي دمرتينا ودمرتي حياتنا انتي منك لله!
عزام بص لها بحزن، لكنه مردش، بينما الست فضلت واقفة بملامح جامدة ونسمة فضلت باصة لها، ومش قادرة تصدق إن الشخص اللي خطفها من أمها، هو نفسه اللي كان سبب في عذاب معتز وهو طفل.
وبعد لحظات، افتكرت حاجة تانية، فلفت ناحية خديجة، وصوتها خرج متقطع من العياط: ماما... في حاجة كمان لازم تعرفيها.
خديجة مسحت دموعها وبصتلها بلهفة: إيه يا حبيبتي؟ قوليلي.
نسمة وهي بتعيط: الست دي خلتني أتجوز واحد بالعافية اسمه خالد. اجبرتني عليه، وأنا مكنتش عايزة الجوازة دي، بس محدش كان بيسمعني. لولا آدم ومعتز ساعدوني ووقفوا جنبي، مكنتش عارفة كنت هعمل إيه.
خديجة اتصدمت وقالت بوجع: إيه؟! جواز بالعافية؟! إنتي كنتي بتعملي في بنتي إيه كل ده؟! حرام عليكي! دي بنت عندها حياة ومستقبل، إزاي تجبريها على جوازة هي مش عايزاها؟!
نسمة كانت بتعيط من قلبها
خديجة: وبعد كل اللي عاشته بسببك، لسه عايزة تتحكمي في حياتها وتجبريها على الجواز؟! إنتي مفيش في قلبك رحمة؟!
الست ببرود: إنتوا مكبرين الموضوع ليه؟! أنا كنت بحاول أظبط حياتها، وأضمن إنها تتجوز وتستقر. وبعدين هي مش أول واحدة تتجوز واحد مش عايزاه في الأول.
نسمة بانهيار وغضب: تظبطي حياتي؟! إنتي بوظتيها! ضيعتي عمري وأنا فاكرة إنك أمي، وخلتيني أعيش في كدبة، وحتى بعد ما سيبتيني وهربتي، فضلتي تحاولي تتحكمي في حياتي وتعيّشيني في الذل والقهر!
الست: أنا عملت اللي شايفاه صح.
نسمة بصرخة: صح إيه؟! إنتي دمرتي حياتي وحياة ولادك! حرمتي ام من بنتها، ودمرتي معتز وهو طفل، وخلّيتي آدم ومعتز يكبروا بعيد عنك بسبب اللي عملتيه! وبعد كل ده لسه شايفة نفسك مظلومة؟!
الست بغيظ: ما أنا قولتلك، عزام هو اللي خرب عليا وخد عيالي مني!
نسمة بصتلها بذهول، وبعدها صرخت: عيالك؟! بعد كل اللي عملتيه فيهم لسه بتقولي عيالك؟! إنتي السبب في كل اللي حصل لهم! سرقتي مني أمي، وضيّعتي سنين عمري ومستقبلي! مش قادرة أصدق إنك كنتي في يوم من الأيام أقرب واحدة ليا!
نسمة بدأت تنهار أكتر، وصوتها بقى متقطع من العياط: أنا اتحرمت من إني أعرف أمي وأهلي طول السنين دي! ليه؟! أنا عملتلك إيه عشان تحرميني من كل ده؟!
خديجة ضمتها وبدأت تمسح على شعرها بحنان: خلاص يا حبيبتي، أنا معاكي ومش هسيبك تاني. حقك عليا إني معرفتش أوصلك يا بنتي.
نسمة وهي بتعيط: أنا مش فاهمة حاجة يا ماما... مش مستوعبة إن كل ده حصل، وإن الست دي طلعت مش أمي!
خديجة: عارفة يا حبيبتي، خدي وقتك
نسمة فضلت متعلقة بحضن خديجة، بينما الست كانت بتراقبهم وعلى وشها ابتسامة باردة بغيظ: أهو كده... كل واحد عرف مكانه. بس متفتكروش إنكم كسبتوا، أنا على الأقل عرفت أوجعكم زي ما وجعتوني.
عزام كان واقف بيبصلها، والغضب اللي جواه وصل لآخره وقال بحدة: إنتي لسه بتتكلمي تاني؟! بعد كل اللي عملتيه، وبعد ما عرفنا إنك خطفتي بنت خديجة ودمرتي حياة ابني، لسه عندك عين تتكلمي؟!
الست: إنت السبب يا عزام! إنت اللي بدأت كل ده لما حرمتني من ولادي!
عزام قرب منها، وملامحه اتغيرت تمامًا بغضب: لسه بتقولي اني حرمتها لأ... أنا استحملت كتير، وسكت كتير، وكنت فاكر إن السنين ممكن تكون غيرتك. لكن واضح إنك لسه زي ما إنتي، بل أسوأ كمان. إنتي جبتي آخرك معايا!
الست رجعت خطوة لورا، لكنه مسكها من رقبتها بعـ..نف، وبدأ يضغط عليها وهو بيصرخ في وشها.
عزام بغضب: دمرتي حياة ابني وهو طفل! وحرمتيني من إني أشوفه يكبر طبيعي! وحرمتِ خديجة من بنتها سنين! ولسه بعد كل ده بتقولي أنا السبب؟!
الست بدأت تحاول تفك إيده، وصوتها خرج متقطع: عزام... سيبني...!
عزام بص لها بعينين مليانين غضب: إنتي مفيش حاجة في الدنيا تستاهليها غير إنك تتحاسبي على كل اللي عملتيه!
نسمة صرخت وهي بتحاول تقرب منه: عمو عزام! سيبها! أرجوك سيبها!
خديجة صرخت هي كمان، وحاولت تبعده عنها: عزام! كفاية! ابعد عنها!
لكن عزام كان فاقد السيطرة على نفسه، والست بتحاول تتنفس وتبعد إيده عن رقبتها.
خديجة وهي بتصرخ وسط دموعها: عزام ! متضيعش نفسك يا حبيبي! سيبها، هي مش مستاهلة تضيع عمرك عشانها!
نسمة كانت بتعيط وبتصرخ من الخوف: سيبها يا عمو عزام! أرجوك! كفاية!
وصل صوت الصريخ لبره المكتب، فالمعازيم سكتوا وبصوا لبعض باستغراب، وبدأ الهمس ينتشر بينهم، وكلهم بقوا مستغربين من الأصوات اللي جاية من جوه.
في نفس الوقت، وصلت عربية معتز قدام الفيلا. نزل منها بصعوبة، وأول ما وقف حس إن الأرض بتتمايل من تحته. كان جسمه تقيل، ورجليه مش شايلينه كويس، وعينيه بتتقفل لوحدها ويفتحها بالعافية. نَفَسه كان بطيئًا، وكلامه مش مترابط، وشفايفه مائلة للزرقة، وكل شوية كان بيحس إنه بيفقد تركيزه للحظات ويرجع يجمع نفسه بالعافية.
استند على العربية شوية، وبعدها اتحرك ناحية الباب بخطوات مترنحة، لحد ما وصل وخبط عليه بإيد مش ثابتة.
فتحت له العاملة، وابتسمت أول ما شافته وقالت بترحيب: حمد لله على السلامة يا دكتور معتز، كلنا مستنيين حضرتك.
معتز ما ردش، ولا حتى بص ناحيتها. عدى من جنبها وهو بيحاول يحافظ على توازنه، وإيده بتتحرك على الحيطة عشان تسنده. العاملة فضلت باصة له باستغراب، لكن هو كان بالكاد قادر يركز في اللي حواليه.
وفجأة، وصل لودنه صوت صريخ جاي من ناحية المكتب.
وقف مكانه بصعوبة، ورفع راسه ناحية الصوت، وحاول يميز الأصوات اللي جاية من جوه. كان سامع صوت خديجة ونسمة، وابوه ، وصوت ست مش عارف يميزه ،ملامحه اتغيرت رغم حالته، وحاول يتحرك ناحيتهم وهو بيجر رجليه بالعافية.وقال بصوت واطي ومجهد: نسمة...؟!
فضل واقف للحظة، مستند بإيده على الحيطة، وعينيه معلقة ناحية المكتب، مش عارف إيه اللي بيحصل جواه، ولا ليه صوتها مليان خوف بالشكل ده...