رواية سر الكارما الفصل الثاني2 بقلم يارا علاء الدين

رواية سر الكارما 
الفصل الثاني2
بقلم يارا علاء الدين
كنت فاكرة إني أخيرًا قدرت أهرب من الماضي وأبدأ حياة جديدة، لحد ما وصلتلي رسالة قلبت حياتي كلها.. رسالة خلتني أكتشف إن السر اللي دفنته من سنين ممكن يكون السبب في خطف بنتي! 💔
ــــــــــــــــــــــــــــــــــــ


السكوت اللي ساد في الصالة بعد ما قرينا الرسالة مكنش سكوت عادي.. كان زي الصمت اللي بيسبق أي انفجار.

الجملة كانت لسه منورة على شاشة الموبايل:

لو عايزة بنتك ترجعلك حية وسليمة... دوري ورا أبوها الحقيقي.

جسمي كله كان بيرتعش وطارق واقف قصادي ملامحه متجمدة، الراجل اللي كان بيمشي بثقة ، شوفت في عينيه لأول مرة نظرة انكسار ورعب حقيقي.

"مريم.." ده أكيد حد تبع "توفيق؟"
الاسم بس لما نطقه بلسانه، حسيت ببرودة في جسمي. ورجعت لورا وأنا بنكمش على نفسي من الرعب.

توفيق..

الشبـ.ـــح اللي قضيت ست سنين كاملة بحاول أهرب منه، الراجل اللي كان مجرد إني أشوف صورته في التلفزيون أو الجرايد بتجيبلي كوابيس وأزمات نفسية.

الراجل اللي ضيعت معاها سنين من عمري في الإهـ.ـانة والتـ.ــعذيب، ولما هربت منه وربنا رزقني بالطوق اللي نجدني منه "طارق "

افتكرت إن الباب ده اتقفل للأبد ومستحيل يتفتح تاني.

"لأ يا طارق.. لأ!" صرخت بصوت عالي وأنا بتهز بهستيريا ودموعي نازلة:

مستحيل.. توفيق ميعرفش حاجة! توفيق من يوم ما اتطلقت منه وسافرت وميعرفش عني أي حاجة، ولا عمره دور عليا ولا عرف إني كنت حامل أساساً! إزاي هيعرف بعد كل الوقت ده ؟


طارق مسك دراعي ببطء وحنان وهو بيحاول يمسك نفسه ونزل على ركبه قدامي:

"اهدي يا مريم.. عشان خاطر كارما.

اللي بعت الرسالة دي عارف التفاصيل المستخبية اللي بينا، عارف إن كارما بنتي في الأوراق الرسمية بس، وعارف إن ليها أب تاني حقيقي.

بس السؤال اللي لازم نلاقيله إجابة :
الخا طف عايز إيه من توفيق؟ وليه بيساومنا إحنا ومبعتلوش هو؟

"مش عارفة.. مش عارفة يا طارق!" حطيت إيدي على وشي وكملت:

توفيق راجل مرعب.. نفوذه كبير والفلوس والسلطة بتخليه يدوس على أي حد يقف قدامه.

وأكيد ده واحد من ضحـ.ــاياه وعايز ينـ.ــتقم منه بس عرف إزاي؟؟؟ والمصيبة الأكبر لو توفيق عرف إن كارما بنته..

مش هيسيبها، ومش بعيد ياخدها مني ويحـ.ــرق قلبي عليها بجد!

طارق غمض عينيه بقوة وبلع ريقه. كان عارف إن كلامي صح.

توفيق مكنش مجرد طليقي ، ده كان كابوس متحرك، راجل معروف في السوق ببروده وقسوته، وليه علاقات مشبوهة ونفوذ يتجاوز حدود القانون.

فضلنا باقي ساعات الليل قاعدين مكاننا في الصالة، الوقت بيمر واحنا مش عارفين نعمل حاجة. طارق حاول يتصل برقم الرسالة ، بس الخط كان دايماً غير متاح أو مقفول. ولما بعت يسأل عن صاحب الخط عرف إنه خط مش متسجل.

ومع أول خيوط شمس الصبح الباهتة، الموبايل بتاع طارق رن.

كان صاحبه "اللواء حازم" من المباحث. طارق رد بسرعة والاسبيكر شغّال:
"حازم بيه! فيه أي جديد؟ لقيتوا أي خيط؟

صوت اللواء حازم كان مستغرب وقال:
"طارق.. إحنا قلبنا الدنيا وتتبعنا تحركات العربيات في المنطقة، بس فيه حاجة غريبة أوي ظهرت في التحريات الأولية ولفتت نظري؟

طارق اتشد وقال:
"إيه هي يا فندم؟"

"طارق.. إحنا من الصبح شغالين على قضيتك وقدرنا نعرف موضوع المناقصة الأخيرة، وإن فيه اسم قوي ظهر على رأس القائمة كأشرس منافس خسر قدامك. (توفيق النويري).

بس الأغرب إن القسم جاله بلاغ مجهول من شوية، صاحب المكالمة قال بالنص: فتشوا ورا توفيق النويري لو عايزين توصلوا للبنت!

الدم اتجمد في عروقي. بصيت لطارق برعب.

اللواء حازم كمل:
"عشان كده حبيت أسألك بشكل مباشر.. هل فيه أي خصومة بينك وبين توفيق النويري كافية تخليه ينتـ.ــقم منك؟

طارق بصلي وهو متوتر ورد على اللواء حازم :
"لأ.. مفيش غير المنافسة الأخيرة يا حازم بيه وده شيء وارد يعني وبيحصل علطول مش سبب للخـ.ــطف!

"تمام..عامة إحنا هنكثف البحث، ولووصلنا لأي جديد هبلغك."

قفل الخط، وأنا اترميت على الكنبة وأنا بصرخ:
"هو اللي خـ.ــطفها!! توفيق عرف وخـ.ــطف البنت عشان ينـ.ـتقم مني يا طارق! رجالته أكيد هما اللي خدوا كارما من الملاهي!"

طارق مسك رأسه بإيديه الاثنين وهو هيتجنن:

"مش منطقي يا مريم! لو توفيق هو اللي خـ.ــطفها، ليه يبعتلنا رسالة يقولنا دوروا ورا أبوها الحقيقي؟! لو هو الخـ.ــا طف، مكنش هيلمح بأي حاجة تلفت نظرنا ليه!

الخاطـ.ــف حد تاني.. حد بيحركنا إحنا وتوفيق زي العرايس لسبب لسه مش معروف.

وفجأة.. وقبل ما نكمل كلامنا، جرس الباب رن.

رنة واحدة.. هادية، ثقيلة، ومتأنية.

طارق اتنفض من مكانه ببطء، مشي ناحية الباب وأنا مشيت وراه وجسمي كله بيترعش. فتح طارق العين السحرية، وفجأة لقيته اتسمر في مكانه، ورجع لورا خطوتين من غير ما ينطق.

"مين يا طارق؟" سألته بصوت مبحوح.

طارق خد نفس عميق و فتح الباب بس اللي كان واقف كان.......

توفيق!

كان واقف بكل كبريائه وقسوته المعتادة. بدلة سودا شيك، نظارة شمس ، وملامح حادة مليانة جبروت. عينيه كانت زي النسر، جردت المكان في ثانية قبل ما تقع عليا. أول ما عينيه جت في عيني، حسيت بروحي بتتسحب مني.

دخل الصالة ببطء ومن غير ما يستأذن، خطواته الثقيلة كان ليها صوت يرعب في صمت الشقة.

طارق اتعدل ووقف بجسمه الطويل بيني وبينه، وزعق بصوت حاد مليان غضب مكتوم:

"إيه اللي جابك هنا يا توفيق ؟! وإزاي تتجرأ تدخل بيتي بالشكل ده؟!"

توفيق بص لطارق بنظرة قرف وسخرية، وحط نظارته في جيب جاكيت البدلة، وقال :

"أهلاً يا طارق.. تؤ تؤ، تؤ، إيه المعاملة دي؟ أنا جاي أواسيك.. مش إحنا أصدقاء في السوق برده؟"

طارق اتعصب من بروده وقال:
تواسي إيه؟! اطلع برة بيتي حالا بدل ما أتصل بالشرطة تيجي تشيلك من هنا!"

توفيق ضحك ضحكة قصيرة وباهتة مفيهاش أي روح، وعينيه زادت قسوة:

"الشرطة؟ وماله الشرطة مسيرها هتيجي متستعجلش..

اتحرك توفيق خطوة لقدام، وقرب من طارق، وعينيه كانت بتطلع شرار:

"أنا جيت بنفسي عشان أفهم.. إيه اللعبة القذرة اللي بتتلعب عليا؟

وليه اسمي يتقال في قضية خـ.ــطف بنتك ؟ إيه العلاقة بيني وبين بنتك يا طارق بيه عشان المباحث تجيب اسمي في القضية دي؟!"

أنا كنت واقفة ورا طارق وجسمي كله بيترعش ، مش قادرة أستوعب اللي بيحصل.

توفيق واقف قدامنا، بيتكلم بثقة وبرود، وباين إنه فعلاً مش فاهم ليه اسمه جه في القضية!

طارق بصله بحدة وصرخ في وشه وهو بيمسكه من ياقة القميص:
"أنت جاي تمثل علينا هنا؟! لو ليك يد في اخـ.ــتفاء البنت أقسم بالله ما هرحمك!

توفيق قرب أكتر، وشفايفه اتلوت بابتسامة مرعبة:
نزل إيدك يا شاطر.. توفيق النويري لما يعوز يأذي حد بيأذيه علطول ومش محتاج يخـ.ــطف عيال صغيرة! أنا أعلى بكثير من العبط ده..

بس الظاهر إن فيه حد بيحاول يلبسني القضية دي أو فيه سر عندك وأنا جاي أعرف أصله إيه!

وفجأة.. وسط الجو المشحون بالشرار والرعب ده.

صوت نغمة موبايل توفيق رنّت!

نغمة حادة ومرتفعة قطعت الكلام.

توفيق طلع الموبايل من جيبه. بص في الشاشة، ورفع حواجبه باستخفاف. وعشان يثبت لطارق وليا إن الموقف كله تحت سيطرته وإنه مبيخافش، فتح الخط وشغّل "الاسبيكر" ببرود وهو باصص لينا بتحدي وسخرية:
"ألو.. مين معايا؟"

الصوت اللي جاء من الناحية الثانية مكنش صوت عادي.. كان صوت راجل أربعيناتي، مبحوح، مليان وجع وغل يهد جبال:
"أهلاً يا توفيق بيه.. يااااه، متعرفش أنا استنيت اللحظة دي بقالي قد إيه؟"

توفيق ملامحه اتغيرت، والشك بدأ يظهر على وشه:

"أنت مين يا ..... أمك؟! وتعرف رقمي الخاص ده منين؟!"

الصوت ضحك ضحكة مكسورة ومرعبة وقال:

"مش مهم أنا مين دلوقتي يا توفيق بيه.. المهم إني أخدت منك حاجة غالية أوي.. حاجة من دمك ولحمك، زي ما أنت أخدت مني أغلى حاجة في حياتي!"

توفيق اتسمر, والبرود اتبخر من وشه في ثانية، وعينيه اتوسعت بذهول ورعب حقيقي. بص لينا إحنا الاثنين، وصوته خرج متوتر:

"أنت بتخرف تقول إيه يا مجنون أنت؟! أخدت مني إيه؟! أنا مفيش حاجة اتأخذت مني! أنت عارف إنت بتهدد مين ياالا?!"

الصوت رد بمنتهى القسوة والبرود:
"دور في دفاترك القديمة يا توفيق.. دور واعرف أنت خسرت إيه النهاردة. قدامك ساعات قليلة أوي، يا ترجعلي اللي أخدته مني.. يا تستلم اللي أخدته منك جـ.ــثة!"

وفجأة.. الخط قطع!

توفيق نزل الموبايل من إيده ببطء شديد، وعينيه بقت تتنقل بيني وبين طارق بذهول وعدم فهم..

بصلنا بصدمة وهو بينهج وقال بصوت واطي ومبحوح:

"الراجل ده بيتكلم عن إيه؟! هو أخد مني إيه؟ وأنا إيه علاقتي ب كارما؟

بصيت لطارق.. وطارق بصلي بنفس الرعب.
الخـ.ــاطف حطنا في مواجهة مباشرة مع توفيق واحنا مش أدها!
تعليقات



<>