"اللي بيحب بجد بيخاف.. بيخاف يتساب، بيخاف يبقى تقيل، بيخاف يبين إنه محتاج، فبيسكت.
واللي قدامه بيفتكر السكوت ده قلة حب، فيسكت هو كمان.
ويفضل الاتنين ساكتين، وكل واحد مستني التاني يبدأ.
مستني رسالة، مستني مكالمة، مستني أي إشارة تقوله إنه لسه فارق، وإن اللي بيحبه لسه فاكره"
اتكلم زين بثقة: "أنا عارف صاحب الخط اللي كتب الرسالة دي....".
اتصدمت عاليا وسألته بلهفة: "مين صاحب الخط".
قربها منه أكتر وهو بيضغط على خصرها: "عايزة تعرفي مين".
اتوترت عاليا جدا وحاولت تبعد عنه شوية لكنه قربها منه أكتر واتكلم برقة: "وحشتيني هو أنا موحشتكيش؟".
ردت عاليا بخجل: "وحشتني".
زين بلهفة: "طب إيه".
عاليا بخجل: "اسكت بقى يا زين وقولي مين صاحب الخط أنا بجد هتجنن وعايزة أعرف".
زين بمشاكسة: "هقولك بس بشرط".
عاليا بدلع: "شرط إيه".
زين وهو بيقرب منها آكتر : "ترجعيلي بقى انتي بجد وحشتيني أوي".
ابتسمت بسعادة وحركت رموش عنيها بدلع واتكلمت برقة: "طب قولي الأول مين صاحب الخط".
ابتسم زين واتكلم بثقة: "زياد".
اتصدمت عاليا: "نعععم مين! زياد أخوك اللي كتب الرسالة دي طب إزاي وليه يزور قسيمة طلاق ويكتب كلام زي ده ويبعتهولي".
زين وهو بيبتسم: "هو كان بينفذ أوامر مش أكتر".
عاليا بدهشة: "أوامر مين؟".
ضحك زين: "جدي طبعا".
دفعته عاليا بسرعة بعيد عنها: "إيييييه! يعني ده كان بترتيب من جدك، أكيد لأ".
زين بثقة: "اللي أنا بقوله ده هو الحقيقة وأكيد جدي طلب من المحامي بتاعه يزور قسيمة طلاق وطلب من زياد يكتب الرسالة وجدي فهم دلوقتي إن أنا عرفت إن هو اللي عمل كده".
بعدت عاليا عن زين وهي بتخرج من أوضة المكتب بغضب وبتنادي على الجد عشان تتأكد إن هو فعلا اللي عمل كده.. وقف زياد وهو مستغرب جنان عاليا وكل شوية تنادي على حد فيهم بالجنان ده وقربت منه عاليا واتكلمت بغضب: "زياد جدك فين؟".
بص زياد لزين ولقاه واقف يضحك ورد عليها بتوتر: "هرب على أوضته من شوية".
عاليا بجنون: "هرب على أوضته!".
رد زياد بدهشة: "أوعي تكوني عرفتي إن احنا اللي عملنا كده".
بصت له عاليا بصدمة: "يعني انت كمان كنت شريكه يا زياد؟".
رد زياد قبل ما يجري من قدامها: "أومال أنا كنت عندك أنا وسجدة بنعمل إيه.. ما أنا اللي اديت الظرف لجدتي عشان تدهولك وتقولك إنه من زين".
صرخت عاليا بجنون وجري زياد من صوتها العالي وقرب منها زين وهو بيضحك بصت له بغضب وصرخت في وشه: "وانت بتضحك على إيه؟ انتوا عايزين تجننوني".
اتكلم زين وهو بيحاول يضمها: "خلاص يا حبيبتي هما كان هدفهم خير ونفسهم نرجع لبعض".
اتوترت عاليا من قربه وحاولت تبعد عنه لكنه ضمها واتكلم بمشاكسة: "أنا عايز الاتفاق بتاعي يتنفذ دلوقتي حالا".
عاليا بخجل: "زين ما تهزرش".
زين بإصرار: " أنا لو سبتك دلوقتي يبقى هو ده الهزار".
عاليا بخجل وهي بتبص حواليها: "زين مش هينفع كده ممكن حد يشوفنا وهيبقى شكلنا وحش".
زين وهو بيقرب من شفايفها: "انتي مراتي وحبيبتي".
= "إيه ده هي الأميرة الضائعة رجعت تاني ولا إيه!".
بص زين وعاليا لصاحبة الصوت وكانت جانيت وجنبها والد زين اللي بص لعاليا بابتسامة واتكلم بلطف: "حمد لله على السلامة يا عاليا نورتي بيتك".
استغربت عاليا من طريقته اللطيفة معاها وردت بلطف: "الله يسلم حضرتك، شكرا".
بصت جانيت لجوزها بغضب من طريقته اللطيفة مع عاليا وطلعت على أوضتها بغيظ وقرب والد زين منه واتكلم بمرح: "مش تطلعوا أوضتكم أحسن من الوقفة هنا ولا إيه".
ضحك زين ورد بمرح مماثل: "أنا بقول كده برضه".
وبص لعاليا وغمز لها بمشاكسة.. ضربته عاليا على دراعه عشان يسكت وما يحرجهاش قدام والده ابتسم والد زين وطلع أوضته ووقف زين وهو بيبص لعاليا: "إيه مش هتحني عليا بقى".
ابتسمت عاليا وهي بتحرك رموش عنيها بشقاوة وبطريقتها المضحكة.. ضحك زين وقال لها: "انتي ما تعرفيش الحركة دي بتعمل فيا إيه".
ابتسمت عاليا وقالت له: "على فكرة أنا لازم أرجع عند جدتك عشان ما تقلقش عليا".
زين ببساطة: "ما تقلقيش أنا هكلمها وهعرفها إننا اتصالحنا وإن انتي رجعتي بيتك".
عاليا وهي بتبعد عنه عشان تمشي: "لا طبعا مش هينفع".
مسكها زين من إيديها واتكلم بمرح: "لااا استني كده.. استني.. هو انتي هتضحكي عليا ولا إيه؟ مش فيه بينا اتفاق".
عاليا وهي بتعمل نفسها مش فاهمة حاجة: "اتفاق إيه أنا مش فاكرة إن فيه بينا اتفاق".
ادعى زين الزعل وترك إيديها: "والله مش فاكرة.. طب براحتك يا عاليا".
عاليا بتوتر: "معلش يا زين أنا فعلا مش قادرة أرجع".
رد زين بتعب: "وبعدين يا عاليا آخرتها إيه أنا بجد تعبت".
ردت بحزن: "آخرتها إن أنا بحبك يا زين.. بس أنا خايفة ومحتاجة شوية وقت".
زين بصبر: "حاضر يا عاليا وأنا هفضل منتظر لحد ما تطمني".
واتنهد بتعب وكمل كلامه: "ممكن تنتظريني هنا لحد ما أطلع بسرعة أغير هدومي وانزل".
هزت عاليا راسها بحزن وهي عارفة إنها زعلته بس غصب عنها هي طول الوقت حاسة بخوف إنه يبعد عنها.. ودايما خايفة إن بعد ما جوازهم يكمل يسيبها بعدها.
طلع زين أوضته وهو بيحاول يكتم غضبه ويكون صبور معاها وبعد وقت نزل بعد ما غير لبسه ووقف قدامها واتكلم بجمود: "يلا بينا".
بصت له عاليا وهي حقيقي مش عارفة تعمل إيه ومشت معاه للعربية ووصلها لبيت جدته وطول الطريق الاتنين كانوا ساكتين ونزل معاها وطلع عند جدته سلم عليها بسرعة وقبل ما يمشي اتكلم وقال لجدته إنه مسافر الصبح في شغل خارج مصر ومش هيرجع غير بعد أسبوع يوم خطوبة زياد.. بصت له عاليا وكان نفسها تسأله هو مسافر فين وليه السفر المفاجئ ده بس عنادها وكبريائها منعها.
مشي زين وهو حزين من عدم اهتمامها ومشي بسرعة من غير ما يتكلم معاها أو يوجه لها أي كلام واضيقت عاليا من نفسها جدا لأنها حست إن بطريقتها دي بتضيع زين منها.
دخلت عاليا أوضتها بسرعة وفتحت البلكونة عشان تشوف زين وهو ماشي وكانت حاسة بروحها وهي بتتسحب مع كل خطوة بيبعدها عنها وفضلت عنيها على عربيته وهي بتبعد لحد ما اختفت.. فضلت واقفة في البلكونة وهي بتعيط وبتتمنى لو يرجع تاني ويطلب منها تكون معاه وأكيد هي مش هتتردد لحظة واحدة لأنها حقيقي ما تقدرش تعيش من غيره..
رواية زين وعاليا بقلمي ملك إبراهيم.
فات يومين وعاليا طول اليومين واقفة في البلكونة وعنيها على الطريق ومنتظرة رجوع زين.. دخلت جدة زين البلكونة وقربت منها واتكلمت بحزن: "إيه يا حبيبتي انتي هتفضلي في البلكونة كده طول النهار والليل".
عاليا بحزن: "أنا مستنية زين.. هو برضه ما اتصلش".
ردت جدة زين بحزن: "لا يا حبيبتي هو ما اتصلش.. هو شكله مسافر وهو زعلان منك يا عاليا صح".
بكت عاليا: "صح".
ضمتها جدة زين بحزن: "معلش يا حبيبتي.. زين بيحبك وإن شاء الله لما يرجع بالسلامة تتصالحوا".
عاليا بحزن: "إن شاء الله.. بس يرجع لأنه وحشني أوي".
جدة زين بابتسامة: "خلاص هانت كلها كام يوم ويرجع عشان خطوبة زياد آخر الأسبوع".
ردت عاليا بأمل: "إن شاء الله".
طبطبت جدة زين عليها واتكلمت بابتسامة: "طب أنا هدخل عشان أنام وحاولي تنامي انتي كمان شوية يا حبيبتي.. الوقت اتأخر".
عاليا بحزن: "حاضر.. شوية كده وهدخل أنام".
ابتسمت لها جدة زين ودخلت عشان تنام وفضلت عاليا واقفة في البلكونة تنتظر لنص الليل.. وفجأة لقت طفلة صغيرة بتعيط في الشارع وهي بتبحث عن مامتها.. استغربت جدا من وجود طفلة لوحدها في الوقت المتأخر ده.. وما ترددتش لحظة واحدة ونزلت بسرعة عشان تشوف الطفلة وتحاول تساعدها.. في الوقت ده كانت جدة زين نامت وخرجت عاليا من البيت بهدوء عشان ما تزعجهاش وخرجت في الشارع وجرت على الطفلة وهي بتكلمها وتسألها عن مامتها وفجأة اتحط على وشها منديل فيه مخدر.. حاولت تقاوم لكنها غابت عن الوعي بسرعة جدا.
رواية زين وعاليا بقلمي ملك إبراهيم.
طلع النهار.
وصحت جدة زين ولقت باب أوضة عاليا مفتوح.. دخلت تطمن عليها واتفاجأت إنها مش موجودة وبدأت تدور عليها في البيت كله ما لقتهاش.. قلقت جدا عليها ومرضتش تتصل على زين عشان ما يقلقش وهو مسافر واتصلت على جده وبلغته إنها مش لاقية عاليا..
عند عاليا حاولت تفتح عنيها بتعب وحاسة بصداع شديد وبعد لحظات فتحت عنيها ولقت نفسها في أوضة غريبة عنها.. حاولت تقوم واستندت على حافة السرير وهي بتحط إيديها على مقدمة راسها بتعب وبصت جنبها وصر..خت فجأة لما لقت أحمد نايم جنبها وهو عا..ري الصدر.
صحى أحمد على صوت صر.. اخها وحاول يهديها وكانت حاطة إيديها على وشها وبتصر.. خ بجنون.. حط إيده على دراعها في محاولة منه إنه يهديها لكنها نفضت إيده بعيد عنها بسرعة.. وبصت له وهي بتعيط بهستيرية: "انت عملت فيا إيه حرام عليك".
وزادت في صر.. اخها أكتر: "عملت إيه يا أحمد رد علياااا".
وقف أحمد من على السرير وهو عا.. ري الصدر وبيرتدي بنطلون فقط.. أخفضت عاليا عنيها بعيد عنه وسمعته وهو بيرد عليها بشماتة: "اللي أنا عملته ده جزء من حقي.. انتي المفروض كنتي تبقي ليا أنا.. مش ليه هو".
عاليا وهي بتصر.. خ بجنون: "اللي انت عملته ده جر..يمة، أنا مش من حقك حرام عليك ربنا ينتقم منك ضيعت حياتي ومستقبلي وخلتني واحدة خاينة منك لله.. حسبي الله ونعم الوكيل فيك يا أحمد".
قرب منها واتكلم بقسوة: "انتي اللي خنتيني لما اتجوزتي واحد غيري".
عاليا بصر..اخ: "انت مجنون! مش انت اللي سيبتني وروحت اتجوزت".
أحمد ببرود: "كنت غبي وخلاص فوقت ومستعد أتجوزك أول ما تطلقي من جوزك".
عاليا وهو بتلطم وجهها بهستيرية: "حرام عليك.. ليه تعمل فيا كده.. دمرت حياتي".
أحمد وهو بيبصلها بشماتة: "الموضوع بسيط جدا وانتي اللي مش عايزة تستغلي عرضي ليك، أنا بقولك أهو اطلقي وأنا هتجوزك وهتبقي وقتها مش خاينة ولا حاجة".
عاليا وهي بتعيط: "اخرج بره يا أحمد اخرج مش طايقة أشوفك ولا أسمع صوتك".
بص لها بسخرية وخرج من الأوضة.. وقفت وهي بتعيط وهي بتفكر في قـ..تل أحمد وإنهاء حياته زي ما أنهى حياتها.. وخرجت من الأوضة ولقت أحمد قاعد ببرود وهو بيشعل سيجارة وضهره كان ليها.. بصت على المطبخ المفتوح على الصالة ودخلته بهدوء وهي بتبحث بعنيها عن سكـ..ينة ولقتها قدامها وأخدتها بسرعة وخرجت من المطبخ وهي مش شايفة غير إن أحمد لازم يمو..ت في اللحظة دي.
شاف أحمد خيالها وهي بتقرب عليه من الخلف.. وقف بسرعة من مكانه واتصدم لما شاف في إيديها سكـ..ينة وقربت منه وهي بترفع إيديها بغضب وعايزة تقـ..تله.. مسك إيدها وهو بيضغط عليها بعنف: "عايزة تقـ..تليني يا عاليا!!..".
عاليا بجنون: "هقـ..تلك يا أحمد زي ما قتـ..لتني ودمرت حياتي".
ضغط على إيديها بقوة ووقع السكـ..ينة منها واتكلم بقسوة: "لولا إني لسه بحبك صدقيني كنت أنا اللي قتـ..لتك دلوقتي".
وتأمل ملامحها الغاضبة وزادت قسوته أكتر وكمل كلامه وهو بيضغط على إيديها بعنف: "دي آخر فرصة ليكي يا عاليا ويا تطلبي الطلاق من جوزك وتتجوزيني يا هبعتله أنا الفيديو الجميل اللي اتصورته معاكي إمبارح ".
بصت له عاليا بصدمة: "فيديو!!".
كمل كلامه وهو بيبصلها: "أنا صورت كل حاجة حصلت بينا واحنا مع بعض.. ما هو ماينفعش يبقى مفيش ذكرى للحظات الحلوة دي".
صرخت عاليا أكتر بجنون وهو قرب منها واتكلم بقوة: "الصراخ مش هيفيدك بحاجة أنا سهل عليا جدا أبعت الفيديو لجوزك وأقول له إن انتي متعودة تجيلي على طول ووقتها مش بس هيطلقك ده ممكن يقـ.. تلك كمان.. لكن أنا عايزها تيجي منك انتي عشان الموضوع ينتهي من غير فضايح وانتي اللي تطلبي منه الطلاق..".
وكمل كلامه ببرود وهو بيتابع حزنها وعياطها بتسلية: "أو ممكن تكملي معاه ونفضل مع بعض عادي وهو أكيد مش هيحس بحاجة".
صرخت عاليا فيه وهي بتلعنه واتكلمت بقوة: "هقـ.. تلك يا أحمد وهاخد حقي منك.. صدقني".
وفتحت باب الشقة وجرت وهي بتعيط ومش شايفة أي حاجة حواليها.. كانت بتجري عكس طريق للسيارات وفي لحظة يأس وجنون رمت نفسها قدام عربية جاية بسرعة و خبطتها العربية.
ووقعت عاليا على الأرض بعد الاصطدام وفتحت عنيها وبصت للسما وهي حاسة إن الموت بيقرب عليها .. والد.. م غرق وشها وجسمها كله بينزف وآخر حاجة نطقتها هو اسم زين وقفلت عنيها واستسلمت للغيمة السودة اللي أخدتها.. والتف حواليها الناس وقربت منها البنت اللي صدمتها بعربيتها وهي بتعيط بخوف وبتطلب من الناس اللي اتجمعوا حواليهم إنهم يتصلوا بالإسعاف بسرعة..
رواية زين وعاليا بقلمي ملك إبراهيم.
وقف أحمد في شقته بعد خروج عاليا وهو بيبتسم بفخر وكان متأكد إنها أكيد هتطلب الطلاق من جوزها وهو هيتجوزها وهيبقى وصل للي هو بيتمناه.. ومسك تليفونه عشان يكلم جانيت.
فتحت جانيت عنيها على صوت هاتفها ولقت أحمد المتصل.. بصت على جوزها اللي نايم جنبها وأخدت التليفون ودخلت الحمام وردت عليه بصوت منخفض.
جانيت: "طمني عملت إيه".
أحمد: "كله تمام اطمني".
جانيت: "شكلك اتبسط".
أحمد: "جدا دي حب العمر".
جانيت: "المهم طمني صورت فيديو زي ما قلتلك".
أحمد: "آه طبعا".
جانيت: "طب ابعتهولي كده".
أحمد برفض: "لا مش هينفع".
جانيت بانفعال مكتوم: "نعم يعني إيه مش هينفع أومال أنا كنت عملت كل ده ليه".
أحمد: "مش انتي اللي يهمك إن عاليا تطلق من زين وأنا أتجوزها".
جانيت: "وهو زين هيطلق عاليا إزاي من غير ما يشوف الفيديو ويعرف إنها بتخونه".
أحمد بثقة: "اطمني عاليا هتطلب منه الطلاق ومستحيل هتعيش معاه بعد اللي حصل بينا".
جانيت بغضب: "طب اعمل حسابك إن في خلال يومين لو زين ما طلقش عاليا انت هتشوف مني وش أتمنى ما تشفهوش"....