رواية زين وعاليا الفصل الحادي والثلاثون31 بقلم ملك ابراهيم
"زين كان شايف إن في حاجة غلط بتحصل حواليه.. شاف بعينيه ارتباك جدته، وسمع كلامها اللي مش مقنع، وحس إن اللي بيحصل مش طبيعي.. بس سكت، عشان عاليا.
عاليا من ناحيتها كانت فرحانة زي طفلة رايحة أول يوم مدرسة.. محتارة تلبس إيه، متوترة، ورغم فرحتها، كانت حاسة إن زين وافق بس عشان يريحها"
زين وهو بيقرب من عاليا أكتر: "أنا موافق يا عاليا.. اشتغلي مع حمزة لو ده هيريحك".
بصت له عاليا بتوتر وهي حاسة إنه وافق بس عشان يريحها لكنه مش حابب إنها تشتغل مع حمزة..
اتكلمت جدته بابتسامة ماكرة: "حبيبي يا زين أيوا كده لازم تفرح مراتك وتديها فرصة إنها تشتغل وتستقل بنفسها.. صدقني ده شيء هيسعدها جدا".
ابتسم زين لعاليا واتكلم بصدق: "وأنا أهم حاجة في حياتي هي سعادتها".
ليتابع حديثه بغموض: "بس مش يمكن فيه حد اتعين في الوظيفة دي خلاص".
ردت جدته بسرعة: "لأ لسه الوظيفة خالية وفي انتظار عاليا".
بص زين لجدته بغموض واتكلم بدهشة: "وحضرتك عرفتي إزاي إن الوظيفة لسه خالية".
ارتبكت جدته واتكلمت بتوتر: "أاصل.. جيلان كانت قدمت على وظيفة في الشركة دي وأنا عرفت إن الشركة جديدة ومحتاجة موظفين كتير".
اندهشت عاليا واتكلمت بعدم فهم: "يعني جيلان هتشتغل في شركة حمزة برضه".
ردت جدة زين بارتباك وعينيها على زين: "مهوو... الشغل هناك ما عجبش جيلان وكمان انتي عارفة إنها هتسافر تاني.. يعني مش هتستقر هنا".
اندهشت عاليا وماكنتش فاهمة أي حاجة.. إزاي جيلان مش عايزة تشتغل وإزاي قدمت على وظيفة.. وإزاي جدة زين ما قالتلهاش إن جيلان كانت هتشتغل في الشركة دي..
بدأت تشعر عاليا إن فيه حاجة غلط.. لكن ثقتها الكبيرة في جدة زين قضت على أي تفكير أو شك أو قلق ممكن تشعر بيه.
نظرات زين لجدته كانت بتحمل الكثير والكثير من المشاعر وأبرزهم شعوره بالخذلان...
كلام جدته مكنش مقنع أبدا وارتباكها وتوترها كان واضح جدا.. لكنه تغاضى عن كل ده وحاول يظهر طبيعي قدامها.
اتكلمت جدته وهي بتحاول تسرع في شغل عاليا مع حمزة وتقضي على أي تردد من عاليا أو من زين.
جدته: "يبقى اتفقنا يا حبايبي وأنا بكره هاخد عاليا بنفسي وأروح معاها الشركة وأحضر معاها الانترفيو".
تحمست عاليا جدا ونظرت لزين بسعادة وحماس.. ابتسم لها بهدوء وعينيه كانت حزينة.. بعد ما شاف بنفسه الوجه الآخر لجدته الحبيبة.
استأذنت جدته وخرجت من غرفتهم وهي بتشعر بالانتصار.. بعد إقناع عاليا وموافقة زين..
وقفت عاليا قصاد زين بعد خروج جدته واتكلمت بصدق: "زين لو انت زعلان.. خلاص أنا هنسى موضوع الشغل ده خالص".
ابتسم زين بهدوء ووضع إيده على خدها ولمسه بحنية واتكلم بعشق: "حبيبتي أنا مستحيل أزعل من أي حاجة ممكن تسعدك".
فرحت عاليا جدا وابتسمت بسعادة وضمته وهي بتقبل خده بقبلات سريعة متتالية.
ضحك زين واتكلم بمشاكسة: "انتي قد الحركة دي".
اتكلمت بدلع: "آه قدها".
وحركت رموش عينيها بطريقتها اللي بيعشقها زين.
ضحك أكتر واتكلم بمرح: "يبقى انتي كده اللي جبتيه لنفسك".
وشالها بسرعة وخفة.
ليتابع بغمزة: "وأنا بقى هعرفك ان انتي مش قد الحركة دي".
رواية زين وعاليا بقلمي ملك إبراهيم.
في الصباح.
فتح زين عينه على ضوء الصباح الباكر والهواء البارد الآتي من الشرفة المفتوحة على مصراعيها وتحركات عاليا في الغرفة.
سند على حافة الفراش وبص لعاليا بدهشة وهي تقريبا مخرجة لبسها كله وحطاه قدامها ووقفة بتبص له بحيرة.
ابتسم زين واتكلم بهدوء: "صباح الخير.. إيه كل ده".
بصت له عاليا واتكلمت بابتسامة: "صباح الخير يا حبيبي..".
وقربت منه واتكلمت بحيرة: "زين أنا مش عارفة ألبس إيه.. أنا محتارة أوي".
رد زين بدهشة: "تلبسي لإيه مش فاهم".
عاليا بحماس: "عشان الشغل النهاردة.. انت نسيت".
رد زين بهدوء: "لا ما نسيتش بس مش فاهم.. إيه المشكلة ما تلبسي لبسك العادي".
اتكلمت عاليا بفضول: "هما الموظفات اللي عندك بيلبسوا لبس عادي ولا فيه لبس معين لازم يلبسوه".
رد زين بمشاكسة وهو بيكتم ضحكته: "بصراحة أنا عمري ما ركزت في لبس الموظفات عندي.. بس أوعدك إني هركز من النهاردة وأشوفهم بيلبسوا إيه وأقولك".
قربت منه واتكلمت بغيظ: "تشوف إيييه".
زين وهو بيكتم ضحكته: "لبسهم.. هو مش انتي عايزة تعرفي هما بيلبسوا إيه".
قربت منه أكتر وهي بتحاوطه بإيديها وبصت له بنظرات نارية واتكلمت بطريقة شريرة: "انت عارف يا حبيبي لو عينك الجميلة اللي بتسحر دي بصت لأي بنت أنا هعمل فيك إيه".
ضحك زين واتكلم بعشق: "يا قلب زين أنا عنيا ما تقدرش تشوف أي بنت غيرك".
ليتابع حديثه وهو بيتجه لأحد الأدراج وأخرج هاتف حديث ورجع وقف قدام عاليا واتكلم بعشق: "خدي التليفون ده خليه معاكي.. هتلاقي عليه رقمي.. لو احتاجتي أي حاجة أو حصل أي حاجة تكلميني على طول".
ابتسمت عاليا وهي بتبص للهاتف بسعادة.
ضحك زين واتكلم بعشق: "أنا وافقت تشتغلي في المكان اللي انتي اختارتيه.. عشان بس أشوف السعادة دي في عيونك".
ليتابع بتأكيد: "بس لازم تعرفي إن فيه عربية هتوصلك كل يوم وتيجي تاخدك وأي وقت أكلمك فيه تردي على طول.. فهماني يا عاليا.. تردي على طوول".
ابتسمت عاليا وردت بدهشة: "هو أنا طفلة يا زين.. إيه كم الوصايا دي كلها".
اتكلم زين بهدوء: "حبيبتي أنا لازم أكون مطمن عليكي وأظن إن ده شيء طبيعي ومن حقي".
بصت له عاليا واتكلمت باستسلام: "حاضر يا زين هعمل كل اللي انت طلبته مني".
ابتسم واتكلم بعشق: "حبيبتي انتي مراتي وأغلى حاجة في حياتي ولازم أكون مطمن عليكي.. ياريت تقدري ده وما تزعليش".
ردت بابتسامة: "عارفة يا حبيبي ربنا يخليك ليا".
زين بعشق: "ويخليكي ليا حبيبتي".
وتركها واتجه إلى الحمام ووقفت عاليا وهي بتبتسم بحماس وبتتمنى إن ربنا يوفقها وتنجح في الشغل الجديد.. وكانت حاسه إنها بتعمل شيء مهم في حياتها.
رواية زين وعاليا بقلمي ملك إبراهيم.
بعد وقت قليل نزل زين وهو ماسك إيد عاليا ووقف واتكلم بمشاكسة: "قوليلي يا حبيبتي.. هتفطري هنا ولا أقولهم يعملولك سندوتشات".
بصت له عاليا بغيظ واتكلمت بسخرية غاضبة: "والله ده على أساس إن أنا بنتك وانت واخدني توديني المدرسة".
ضحك زين واتكلم بهزار: "والله أنا حاسس بكده فعلا".
اتغاظت عاليا ودفعت إيده بعيد عن إيديها واتكلمت بغيظ: "طب سيب إيدي بقى.. واعرف إن أنا كبيرة وأقدر أعتمد على نفسي".
ضحك أكتر واتكلم بمرح: "خلاص يا لولو أنا بهزر معاكي..".
ليتابع وهو بينظر لغضبها الطفولي وبيضحك أكتر: "خلاص بقى ما تزعليش".
اقتربت منهم جيلان وقربت من زين وهي بتنظر لعاليا بمكر وكلمت زين بدلع.
جيلان: "على فكرة يا زين أنا زعلانة منك أوي أوي".
رفعت عاليا حاجبها وردت هي على جيلان: "لأ ملوش حق يزعلك".
لتتابع حديثها بغيظ وهي بتبص لزين: "بس يا ترى هو زعلك في إيه؟".
ضحك زين على طريقة عاليا وغيرتها الواضحة ونظرات عينيها النارية القادرة على حرق جيلان.
لترد جيلان بدلع مستفز: "انت عارف يا زين أنا راجعة مصر بقالي قد إيه.. وانت لحد دلوقتي ما خرجتش معايا ولا مرة".
ردت عاليا بتلقائية: "وحياة أمك".
بص زين لعاليا بصدمة وفضل يضحك.
غضبت جيلان جدا.. وزاد من غضبها ضحك زين على طريقة مراته وكلامها.
حاولت عاليا تصحح اللي قالته.. عشان ما تزعلش زين.
عاليا: "أأقصد.. وحياة مامتك.. انا مش قصدي حاجة وحشه دي كلمة عاديه يعني".
زين ضحك آكتر وقال ل عاليا: "خلاص يا حبيبتي.. إحنا فاهمين ان انتي مش قصدك حاجة وحشه ".
ليتابع وهو بينظر لجيلان: "وانتي يا جيلان معلش أنا مش فاضي خالص زي ما انتي شايفة..".
بصت لهم جيلان بغضب مكتوم.
زين تجاهل نظراتها واتكلم بهدوء: "عن إذنك يا جيلان احنا هنروح نفطر.. انتي مش هتفطري ولا إيه".
ردت جيلان بغيظ: "مليش نفس.. شكرا اتفضلوا انتم".
وصعدت جيلان الدرج وهي هتموت من الغضب والغيظ.. تابعت صعودها عاليا وبصت لزين واتكلمت بخجل: "على فكرة أنا فعلا مكنش قصدي بس هي اللي استفزتني".
رد زين وهو بيضحك: "عارف حبيبتي.. يلا بينا عشان نفطر كده هتتأخري على المدرسة.. أأقصدي على الشغل".
اتغاظت عاليا واتكلمت بثقة: "اتريق براحتك.. بكره تتمنى إني أشتغل عندك في شركتك".
رد زين بعشق: "والله أنا بتمنى من دلوقتي.. بس انتي اللي مش عايزة تبقى معايا".
اتكلمت عاليا وهي بتحاوط رقبته بدلع: "حبيبي أنا بتمنى أبقى معاك دايما.. بس أنا عارفة إني لو اشتغلت معاك انت هتدلعني وأنا عايزة أشتغل بجد".
هز زين راسه بتفهم: "فاهم يا حبيبتي.. يلا بينا عشان نفطر".
على السفرة.. كان الجد وزياد وقسمت وجدة زين بيفطروا.. بص الجد لعاليا واتكلم بابتسامة: "سامع إن انتي هتبدأي شغل جديد النهاردة".
اتكلمت عاليا برقة: "آه يا جدي.. ادعيلي لأني بجد متوترة أوي".
مسك زين إيديها وهو بيطمنها إنه معاها.
ابتسم الجد ورد بحماس: "لأ اجمدي كده.. أنا بنتي شطورة".
اتكلمت عاليا بدهشة: "هو ليه أنا حاسة إن أنا رايحة المدرسة مش رايحة أشتغل".
لتتابع بجدية: "هو أنا شكلي مدي على إني رايحة المدرسة بجد.. يعني زين يقولي سندوتشات وجدي يقولي بنتي شطورة".
ضحك الجميع واتكلم زين بجدية مصطنعة: "بصراحة انتي شكلك فعلا وكأنك رايحة المدرسة".
اتغاظت عاليا وردت عليه بغضب: "ماشي يا زين بكره تندم على تريقتك عليا دي وتتمنى إني أشتغل في شركتك وتبوس إيدي كمان".
ضحك زين وكان حرفيا هيموت من الضحك.. وضحك معاه جده وزياد.
اتغاظت عاليا ونظرت لجدة زين واتكلمت بغضب: "يلا ماما عشان نمشي.. أنا عارفة إنهم هيفضلوا يضحكوا كده طول اليوم".
وقفت جدة زين معاها وهي بتظهر قدمهم الوجه الملائكي واتكلمت بمرح مصطنع: "يلا يا قلب ماما وسيبك منهم.. دول عايزين يحبطوكي".
ضحك زياد واتكلم وهو بيضحك بشدة: "استني يا عاليا انتي أخدتي المصروف بتاعك ولا لسه".
ضحك الجد وزين بشدة مع زياد.
اتغاظت عاليا واتكلمت بغضب: "ماشي يا زياد حتى انت كمان".
وبصت لزين اللي كان هيموت من الضحك وقالت له بغيظ: "وانت اضحك براحتك بس لما أرجع لك".
ضحكوا أكتر واتكلم الجد مع زين بمرح: "ربنا معاك لما ترجع.. أكيد هتطلع كل ده عليك انت".
رد زين بضحك: "ما أعتقدش أكيد هتكون مشغولة بكتابة homework".
عاليا بصت لهم بغيظ وخرجت مع جدة زين.
رواية زين وعاليا بقلمي ملك إبراهيم.
وصلت عاليا مع جدة زين لشركة حمزة وكانت متوترة ومرتبكة جدا.. ادعت جدة زين إنها أول مرة تيجي المكان ده وسألت عن مكتب حمزة وطلبت مقابلته.. وقفت عاليا وهي حاسة بقبضة خفيفة في قلبها.
بعد لحظات خرجت بنت من مكتب حمزة واتكلمت بهدوء: "اتفضلوا الباشمهندس منتظركم".
دخلت جدة زين في الأول ودخلت عاليا خلفها بخطوات بطيئة مرتبكة جداا.
وقف حمزة وهو بيرحب بيهم بطريقة مبالغ فيها ونظر لعاليا بسعادة ولهفة ما قدرش يداريها.. لاحظتها جدة زين وابتسمت بمكر.. لكن عاليا ما قدرتش تلاحظ أي حاجة بسبب توترها الزايد.
اتكلمت جدة زين بابتسامة: "احنا هنا عشان الوظيفة اللي كنت اتكلمت مع عاليا عليها.. احنا قدرنا نقنع زين.. وعاليا مستعدة تبدأ شغل من بكره".
رد حمزة بلهفة: "وليه من بكره.. عاليا تبدأ من النهاردة".
اتكلمت عاليا بارتباك: "أنا كنت شرحتلك قبل كده إن دي أول مرة أشتغل في شركة وفي المجال ده عموما".
رد حمزة بتفهم: "ما تقلقيش أنا فاهم وعموما أي موظف جديد بيدخل مرحلة تدريب الأول قبل استلام العمل".
ابتسمت عاليا بهدوء واتكلمت جدة زين وهي بتنظر لحمزة بمكر: "يعني كده عاليا خلاص بقت معاكم".
رد حمزة بتأكيد: "طبعا وأنا اللي هدربها بنفسي".
ابتسمت جدة زين بثقة ووقفت وهي بتتكلم بابتسامة ماكرة: "خلاص أنا هستأذن أنا وأسيبكم تشوفوا شغلكم".
وقف حمزة وابتسم لها واتكلم بهدوء: "نورتي يا هانم وما تقلقيش حضرتك على عاليا".
ردت جدة زين بمكر: "أنا دلوقتي بقيت متطمنة على عاليا جداا".
وبصت لعاليا واتكلمت بخبث: "بالتوفيق يا حبيبتي".
ابتسمت عاليا وخرجت جدة زين من مكتب حمزة.
ابتسم حمزة لعاليا بعد خروج جدة زين واتكلم بهدوء: "فيه مهندسة معانا هنا ممتازة جدا.. هي بتقوم بمهام السكرتيرة في الوقت الحالي.. هي اللي هتدربك ومتأكد إنك هتستفادي منها جدا".
بصت عاليا لحمزة بدهشة بعد تغير كلامه بعد ما قال قدام جدة زين إن هو بنفسه اللي هيدربها.. ودلوقتي بيقول إن فيه بنت هي اللي هتدربها وبدأت تشعر عاليا إن فيه شيء غريب بيحصل حواليها هي مش فاهماه.