قصة ابنة الشيطان
الجزء الثانى
لقيت ادامي كائن اسود طويل وليه قرون صغيره وعنيه صفرا تماما وجسمعه كله شعر غزير ابتسملي سنانه ظهرت بيضا جدا جدا كان في نور طلع من بؤه
ازيك يا ياقوت حمدلله عالسلامه نورتي بيتك .
حااولت افتح بؤي عشان اتكلم لكن صوتي مش بيخرج ..عماله احاول اجمع الكلام ..قلتله انت مين
انا عارف انك متعرفنيش ويمكن محدش حكالك عني بس انا براقبك من زمان وعارف كل اخبارك
ااا انت ميييين
..انا جدك العزيز
فضلت اصرخ اصرخ وحطيت اديا الاتنين علي عنيا عشان مشوفش
لقيته بيقول انا هسيبك دلوقتي وهجيلك مرة تانيه لما تهدي
فضلت احط اديا علي وداني عشان مسمعش و اغمض عيني جاااااااااامد خايفه افتحها ..استنيت شويه وبعدين فتحت عيني
لقيت جدي واقف ادامي ومعاه الكلب وبيققولي ياقوت يا حبيبتي انا نسيت اقولك حاجه ..انا لسه قايل لاختك اوعو حد منكو يطلع الدور التالت لاي سبب مسكت نفسي وقلتله هي مرجان فين؟
ف اوضتها يا حبيبيتي
انا عايزه اروحلها دلوقتي
حاضر تعالي معايا ..
مشيت معاه لاخر الطرقه لحد موصلنا لاوضه مرجان لقيت الباب مفتوح ولقيتها اعده عالسرير وماسكه عروسه ااول مره اشوفها وعماله تضحك وفرحانه اوي وعماله تكلمها وتقولها انا عمري مهسيبك يا حبيبيتي
مرججججان في ايه وايه العروسه دي
دي عروس كانت بتاعت ماما جدي اداهالي
يلا يا حبيبي عشان تتعشو انا جبت اكل جاهز
وقفل الباب وطلع
مالك يا ياقوت مكشره كدا ليه
كان معاكي حق البيت دا في شي مش طبيعي انا شفتت..
لقيتها برقتلي وقاطعتني و قالت
شششششششششششش متقوليش حاجه شوفتي الي شوفتيه متحكليش
اييه؟ محكلكيش ازاي
هو كدا مينفعش نحكي لبعض حاجه خالص هنعيش زي مكنا عايشين مع ماما فالكويت - لانري لا نسمع لا نتكلم
بصيتلها باستغراب هي مش دي اختي الي كانت هرياني اسئله واحنا جايين ؟ ايه الجبروت الي هي فيه دا
يلا بقي ننزل نتعشي وننام انهارده بدري عشان نصحي بكره اليوم من اوله نحضر حاجتنا ونجهز للجامعه
سكتت مش لاقيه حاجه اقولها
نزلنا نتعشي ..طول محنا اعدين عالترابيزة ماسكة العروسة مبتسيبهاش ..
سيبي العروسة عشان تعرفي تاكلي انتي مش مركزة فالاكل وعماله تلعبي ؟
عادي ايه المشكلة يا ياقوت يا حبيبيتي عموما لو عايزه عروسه انتي كمان في لعب كتير اوي فالمحزن بتاعت مامتكو بكرة اما ترجعو من الجامعه تبقي تبصي وخدي الي انتي عايزاه
ربنا يخليك يا جدي شكرا انا بتكلم عشان تاكل بس ..احنا خلاص كبرنا عاللعب بالعرايس دا الي عايزه اقولهولها بس هي مش سمعاني اصلا بس طبعا هاجي معاك المخزن وهاخد لعبه .
ماشي يا حبيبيتي الي تحبيه انا هقوم اغسل ايدي و هروح مكتبي عندي شويه شغل و حجات هعملها وبعدين هنام
شغل ايه فالضلمة دي ؟
بصلي حتة بصة وبرقلي وقالي
عندي شغل هخلصه يا ياقوت
بصراحة خفت قلتله ماشي يا جدي براحتك
ورجع لابتسامته الودودة زياده عن اللزوم
عمري محبيت الشخصيات الودودة اوي اوي دي حتي لو جدي ..مش مريح بالنسبالي ...اصلا في نظريات بتتكلم عن فوبيا الاشخاص الودودين .. تحس ان غالبا بيبقي وراهم مصيبه.. واهو فجاة اتحول وبقي مرعب ومش ودود.. وبعدين بيشتغل ايه جدي ؟ الي اعرفه انه كان ظابط فالجيش و حضر حرب 1973 وبعدها ساب الجيش خالص واشتري المزرعه دي وعاش هنا ...يمكن عنده حاجه تانيه
ياقوووووت
سرحت فالخواطر دي كلها بس صوت جدي قطع حبل افكاري
ياقوت ياقوت انتي سمعاني يا حبيبيتي
ايه يا جدي مروحتش ليه مكتبك
منا عمال اكلمك من ساعتها وانتي سرحتي وروحتي ف ملكوت تاني
لالامعاك
مكن تشيلي باقي الاكل بعد متخلصي انتي واختك ..ضروري تشيليه..اوعي تنسي الاكل باقي الاكل خالص لاي سبب
حاضر ..بس انا مش عارفه المطبخ فين ..امشي اخر الطرقه دي عاليمين وخدي معاكي الشمعدان اهو ينورلك
حاضر
ومشي ..ببص علي مرجان لقيتها زي ماهي ماسكه العروسه وبتاكل ب ايد وبتاكل العروسه وبتضحك
انتي يا ماما يامرجان..انتي اتخبلتي؟ ايه العروسه المعفنه الي ف ايدك دي بتاكليها كمان؟ يا صلاة النبي ..احنا منروحش بعد بكرة الجامعة انتي يا ترجعي الحضانه يا ادخلك مستشفي المجانين
بس يا يا ياقوت..هزارك زاد اوي خلاص لو خلصتي اكل قومي ملكيش دعوه بيا و قامت واخده العروسه وقايمه
طب خلاص انا اسفه متزعليش ..طيب خدي الشمعه تنورلك
ادورت اجيبلها شمعه من الشمعدان الي جمبي واديهالها
لقيتها اختفت!!!
هي لحقت تمشي امتي ؟ وتطلع السلم دا كله امتي؟
مرجان انتي بتهزري معايا؟ مرجان انتي فين؟ مسكت الشمعدان وجايه اقوم ..لقيت حاجه مسكت رجلي من تحت الترابيزة
قمت صرخت
ووقعت علي ضهري والشمعدان الي ف ايدي وقع عالارض و اتطفي كله ماعدا شمعه واحده بس ..مسكتها ف ايدي..الاضاءة بقت خاااااااااااااااااااااااااافته جدا بس انعكاس اضاءه الشمعه عامل خيال عالحيطة ..في هوا جاي ف وشي مش عارفه جاي منين و ضوء الشمعه عمال يتهزو كانه هينطفي و الخيال يتهز عالحيطة .. حاولت احط ايدي حوالين الشمعه عشان احجزها عن الهوا ..وانا بقوم ببص عالحيطه لقيت خيالي انا ظاهر جدا واقفه و ف ايدي شمعة ...بس في خيال تاني جمبي
مرجاان بطلي هزار انتي فين
بصيت جمبي ملقتش حاجه..بصيت عالحيطه تاني لقيت فعلا في خيال حاجه صغيره جمبي زي ميكون طفل بيحبي ...وفي خيال تاني جاي وراه كانهم طفلين صغيرين بيحبو ورا بعض وبعدين واحد منهم وقف ..كان صغير جدا وبعدين شاور عالي حاجه ادامه و رفع ايده بيشاور علي حاجه فوق فالسقف تقريبا وبعدين فضل يكبر يكبر يكبر يكبر لحد مبقي كبيييييييير ورجليه طويييييييييلة واديه طويله وليه شعر طويييييييييييل وقرنين ..خفت جدا و لساني اتشنج معرفتش انادي لا علي مرجان ولا علي جدي ..بصيت جمبي تاني ملقتش حاجه بصيت عالحيطه لقيت الخيال بقي ليه عنين كبيرة و حمرا جدا و حرك اديه وكانه بيخرج من الحيطة ..وخرج فعلا ….وقرب مني وانحني وقرب من وشي وبصلي… وقالتلي
ياقوت حبيبيتي ..بقيتي زي القمر … فاللحظه دي لساني اتفك وصرخت
صرخت صرخت باعلي ماعندي.. لقيت ادامي الكلب ميمون معرفش جه امتي لقيته واقف عند الحيطه وفضل يهوهو يهوهو وانا اصرخ ..لحد ما مرجان جت لقيتها ماسكه العروسه ف ايدها وقالتلي
مالك في ايه بتصرخي كدا ليه ؟
حضنتها وفضلت اعيط واقولها انا بشوف حجات غريبه من ساعت مجيت انا خايفه
طبطبت عليا ..متخافيش دول اهلنا تعالي نشيل الاكل وننام ..وخدتني من ايدي ..جرتني بمعني الاصح و حطت العروسه عالترابيزه ولمت الاطباق وادتهالي وشالت العروسه تاني و قالتلي يلا.. ومسكت الشمعه وروحنا المطبخ
طول محنا ماشيين سامعه صوت ضحك اطفال مش عارفه جاي منين ..
مرجان انتي سامعه حاجه
تؤ..
يابنتي في صوت اطفال والله العظيم بتضحك
شكلك انتي الي اتجنيتي يا ياقوت وبتتريقي عليا عشان لعبت شويه بعروسه
انتي مش قلتي شفتي حجات غريبه انتي كمان ومش هنتكلم و هنبقي زي مكنا فالكويت
مردتش
دخلنا المطبخ مرجان حطت الشمعه علي الرخامه و حطت العروسه جمبها وكان وش العروسه للشمعه وانا وقفت بعيد شويه سندت علي دولاب موجود ..هوصفلكم العروسه..هي كبيرة نوعا ما فحجم طفل عنده سنتين مثلا لابسة فستان احمر نص كم كدا و شعرها اسود طويل وفيه فيونكه ..اول مره اشوف عروسه زي دي .... و لابسه شنطة ..حجم الشنطة اد كف الايد كدا .. ..شكلها جديد ونضيف علي الرغم من انها المفروض قديمه وبتاعت ماما وهي صغيره
هاتي الاطباق اغسلها
خدي
وقفت ابص عالعروسه واتاملها مرجان هي الشنطة دي فيها ايه
شنططه ايه
اللي العروسه لابساها
مش عارفه
مفتحتيهاش
لا
معقول معندكيش اي نوع من الفضول خالص
تؤ
ياساتر عليكي ..انا هفتحها
وانا رايحه ناحيه العروسه ..لقيت راس العروسه . ادورت و بصتلي
صرخت
مرجان اتخضت وصرخت هي كمان ووقعت الطبق من ايدها اتكسر
العروسة اتدورت وبصتلي وبعدين رجعت تاني لو ضعها الاولاني .. المرادي كانت معايا مرجان يعني مش لوحدي ..قلتلها شايفه
عمالة اقولك كل حاجة مش طبيعية فالبيت ..حتي العروسة ملبوسة
شاورتلي ب اديها عشان اسكت .. ياقوت ..في صوت بيخرج من العروسة
ياشيم انان اليش شولو اجناش يوهال
ياشيم انان اليش شولو اجناش يوهال
انتي سامعه يا ياقوت ياقوت .....