االحب الأخير
الحلقه التاسعه
حقق الفيلم نجاحا أكبر عند عرضه للجماهير مما رفع أسهم نجوميته. أرادت الممثله صاحبة القضيه أن تهدم ذلك النجاح
من خلال ظهورها في كل وسائل الإعلام تهاجمه وتذكر الناس بجلسة القضيه التي ستكون بعد أسبوع، مما جعله يشعر بتوتر شديد وأصبح شديد العصبيه-خاصة لأنه إمتنع عن الخمرمنذ فتره – فقلت له:
-هتفضل متوتر كده وحابس نفسك لإمتى؟؟
-سيبيني في حالي
-هتستسلم كده بسهوله؟؟ وتسيبها تفسد عليك فرحة نجاحك؟؟
-أمال أعمل إيه؟؟
-تسبقها قبل ما تسبقك ماسمعتش صاحب القريه لما قال إنها كانت بتخونك يعني ممكن ما يكونوش أولادك وممكن ما يكونوش أولادها أصلا
-إزاي؟؟
-تكون مأجراهم بس عشان تعملك فضيحه وتاخد منك قرشين مثلا فاطلب في المحكمه عمل تحليل لها ولهم قبلك
-dnaقصدك
-أيوه ولو طلعوا أولادها اعمل انت كمان التحليل لو مش ولادك هتبقى فضيحه لها ولو ولادك لازم تتحمل مسئوليتهم وكده تبقى قطعت الشك باليقين
-وحتى لو أولادي إزاي واحده زي دي كانت بتخوني وهي مراتي مع أصحابي تربي أولاد؟؟
-ساعتها ممكن تثبت إن سلوكها سيء وتضمهم لحضانتك وإنت تربيهم
-هاكلم المحامي وأشوف رأيه
بعد عدة أيام جاء حاتم فرحا وإحتضنني وقبلني في وجنتي وقال:
-التحاليل أثبتت إنهم مش ولادها أصلا وكمان الطب اثبت عدم قدرتها على الإنجاب، إنتي هايله مش عارف أعملك إيه؟؟ عموما ده شيك ب 20 ألف جنيه عشانك
-بس أنا ما طلبتش فلوس
-عارف بس أنا عارف كمان إنك بتحبي الفلوس
-والله ما إنت عارف حاجه
-قصدك إيه؟؟
-أنا بحب الفلوس عشان مستقبل إخواتي وبس غير كده ماتهمنيش
-يعني لما إخواتك يكبروا هتدوري على واحد فقري زيك تتجوزيه؟؟
-ومين الحمار اللي هيرضى بمطلقه فاتها القطر
- قصدك مين الحمار اللي يقدر يقاومك
إقترب مني وغمرني بقبلاته التي تجعل مقاومتي تنهار في لحظات، نام بجواري وأنا أتأمله ، نعم أنا أعشقه ليس تعود ولا رغبه بل عشق، لكن عشقي له مكتوب له أن ينتهي قبل أن يبدأ
، فحاجته لي إنتهت وإستعاد نجاحه وتحسنت سمعته والحكم لصالحه جعله يبدو مظلوما مما زاد من تعاطف الناس معه. شعرت أن النهايه قادمه وعلي أن أنسحب قبل أن يمل مني عندما يعود نجم النجوم كما كان، سأتركه ولكن حبه سيظل معي للأبد، فيبدو أن قدري أن أعشق بلا أي امل.
بعد عدة أيام جاءني إتصال من أخي يخبرني أن خالتي حالتها الصحيه سيئه جدا وعلى وشك الموت فأدركت أن وقت عودتي لحياتي قد حان فقلت لحاتم:
- إنت مش واخد بالك إن الإتفاق اللي بيننا إنتهى؟؟
-قصدك إيه؟؟ عايزه تسيبيني؟؟
-إحنا بيننا إتفاق هترجع فيه ولا إيه؟؟
كنت فاكرك نسيتي الإتفاق وبتحبيني، كل تصرفاتك معايا بتقول كده ولا كنتي بتخدعيني؟؟ –
-لا مش باخدعك بس ظروفي بتتحكم فيه
-ولو قلت لك إني بحبك ومحتاجلك جنبي هتسيبيني برضه؟
-أنت إتعودت على وجودي معاك مش أكتر وبكره لما تلاقي الحب الحقيقي هتعرف إن اللي إنت فيه ده كان وهم
-أد كده مشاعري مش واصله لك
-حاتم أرجوك ما تصعبش الفراق أكتر ماهو صعب بجد
-ولما هو صعب هتسيبيني ليه؟ ليه مصممه نعيش في عذاب وإحنا نقدر نعيش في سعاده؟
-ظروفي أقوى مني وبتجبرني على إختيارات غصب عني خالتي بتموت ولازم أكون جنبها وإخواتي محتاجين لي معاهم وماعنديش حل تاني، أحيانا الحياه بتجبرنا على إختيارات صعبه علينا لكن كله مكتوب ولازم نرضى بيه.
-ما ينفعش تجيبي إخواتك يعيشوا معانا؟؟
-لو إستحملتهم شهر مش هتستحملهم التاني، كمان مش عاوزاهم يتعودوا على حياتك اللي كلها أضواء ونجوميه وشهره وهم لسه صغيرين ممكن يتأثروا بشكل مش كويس، كمان عايزاهم يتعرفوا إن الحياه صعبه ويتعلموا يواجهوها ويتحدوها
-يعني إتقفلت ولازم نفترق، وهتقدري على البعد؟
-أوقات كتير بنكون مع ناس بأجسامنا لكن قلوبنا وعقولنا في مكان تاني، وكتير بنكون بعيد عن ناس بأجسامنا لكن أرواحنا بتتلاقى ، البعد مش بعد المسافات لكن بعد الأرواح، خلي بالك من نفسك وإعمل دايما اللي يرضي ربنا ويرضي ضميرك
-مش هاقدر أنساكي إنت حد مختلف عن كل اللي أعرفهم ، وعمري ما إرتبطت بحد بعد أمي زيك وعمري فتحت قلبي لحد زيك وعمري ما حسيت إني عايز أكمل مع واحده لأخر عمري غيرك
-محدش عارف بكره مخبي لنا إيه، أشوف وشك بخير.