رواية لعنة الصمت)
الفصل الاول1
بقلم عمرو راشد
صباح الخير يا حبيبي
= صباح الزفت على دماغك و دماغ اهلك
تحب احضرلك الفطار
= وانتي لسة محضرتيش الفطار ، قومي حضريه بسرعة يا بنت****
" للوهلة الأولى هتفتكر انه زوج قاسي ومش بيحبني لكن زياد مكنش كدا نهائي ، زياد كان شخص كويس جدا وقلبه ابيض وبيحبني بس اتغير من فترة و التغير دا كان بسبب امي ، امي هي اللي بوظت حياتي ، الموضوع بالظبط بدأ من شهرين
انتي لازم تضمني حقك
= يعني اعمل ايه يا ماما
خليه يكتبلك الشقة ب اسمك
= لا لا ملوش لازمة يا ماما ، انا و زياد واحد مفيش فرق بينا
الرجالة كلهم واحد ، ملهمش امان ، لازم تضمني حقك منه بدل ما يتجوز عليكي و يرميكي في الشارع
= زياد مستحيل يعمل كدا
ليه هو مش راجل ، يبقا ممكن يعمل
بس زياد غير اي حد
= اسكتي أنتي ، انا عارفاهم كويس ، انا هكلمه في الموضوع دا لما يرجع و اخليه يكتب الشقة ب اسمك
و افرضي مواففش
= وهو يقدر ميوافقش ، انا هضغط عليه عشان يوافق
هتعملي ايه يا ماما
= هتشوفي
" دخلت الأوضة بناء على كلام ماما وبقت هي اللي مستنياه في الصالة ، سمعت صوته برا وماما بتتكلم معاه
بص يا زياد يا حبيبي ، انت عارف طبعا اني مليش غير سلمى في الدنيا ، و لازم احافظ و اضمنلها حقها
= و سلمى في عنيا يا طنط ، حضرتك مش عارفة انا بحبها قد ايه
" ابتسمت تلقائي لما سمعته بيقول كدا ، بس ماما مدتنيش الفرصة اني اسرح و اكمل في خيالي
انا عارفة طبعا بس برضو الحق ميزعلش
= حق ايه ، انا مش فاهم حاجة
بصراحة كدا ، انا عايزاك تكتب الشقة دي بإسم سلمى
اشمعنا
= عايز اضمن حقها وحق ابنها من بعدك ، ربنا يديك طولة العمر طبعا
انا كل اللي املكه ملك سلمى و ابني
= لازم يبقا على ورق بقا مش كلام و خلاص
ورق!
= اه قولت ايه
قولت اني مش حابب دا ، خلينا نأجل الموضوع دا
= طب ولو قولت عشان خاطري
خاطرك غالي عليا ، بس انا اسف انا شايف ان دي فكرة غلط تماما
= بقا كدا يا زياد ، طيب ماشي
" لقيت ماما بتنادي عليا
سلمى ، يا سلمى
= نعم يا ماما
يلا لمي هدومك عشان هتيجي تقعدي عندي ، اصل جوزك مستخسر فيكي حتة شقة
= يا ماما طب اهدي ونتفاهم
لا مفيش تفاهم ، يلا قدامي
" عنيا متشالتش من عليه ، قاعد مش عارف يعمل ايه ، كأنه تايه ، شكله متوتر بس فجأه قام وقال
خلاص يا حماتي ، انا هكتبلها الشقة
= لا يا حبيبي خلاص شكلك مش ضامنها
وهو دا معقول برضو مش هضمن مراتي ، انا هكتبلها الشقة ، كدا كدا انا و سلمى واحد
= عين العقل يا حبيبي
" بعدها بشوية ماما مشيت وهو قام دخل الأوضة من غير كلمة واحدة ، حتى انا حاولت اتكلم معاه بس كان مش مركز معايا ، عموما سيبته و نمت ، قلقت تاني يوم لقيته لسة قاعد جنبي
ايه دا يا زياد ، انت لسة منمتش
= لا مش جايلي نوم
ليه كدا
= لا متشغليش بالك ، انا هنزل دلوقتي
بقلم #عمرو راشد
" حبيت اغير المود وقومت حضرت الاكل وعملت الاكل اللي بيحبه و استنيته يرجع ، بس لما رجع فاجئني وقالي انه ملوش نفس و هيدخل ينام ، طريقته اتغيرت 180 درجة ، بينام كتير ومش بيتكلم معايا نهائيا ، ساكت طول الوقت وباصص في موبايله ، عدا يوم والتاني والتالت ، داخلين في اسبوع لحد ما لقيته داخل عليا وانا واقفة في المطبخ وقالي
دا عقد الشقة ، كتبتها ب اسمك ، مبروك عليكي
= بجد يا زياد ، انا مش مصدقة انك عملت كدا فعلا عشاني
انا اعمل عشانك اي حاجة بس ميجيش اليوم و تخليني اندم على اللي عملته
= خليك واثق فيا يا زياد ، انا مستحيل هخذلك
طب انا هدخل ارتاح
" كنا في اخر الاسبوع و عزمت ماما على الغدا وكنت حابة اننا نتجمع يمكن زياد حالته تتحسن شوية ، ماما جت وجهزت الاكل اما زياد كان لسة مرجعش من برا ، كلمته وقالي انه قدامه 5 دقايق ويوصل وبالفعل الحمدلله وصل وما صدقت اننا هنقعد سوا لكن هو قال
يلا يا زياد عشان ناكل ، انا جعانة أوي
= لا انا مليش نفس ، كلو انتو بالهنا والشفا
" سابنا و دخل جوا ، ماما استغربت منه وسألتني
أنتي متخانقة مع جوزك يا سلمى
= لا يا ماما أبدا ، ثواني انا هدخل اشوفه
" دخلت وراه لقيته بيغير هدومه ولسة هينام
ايه اللي انت عملته دا
= عملت ايه
ازاي تسيبنا و تدخل تنام وانت عارف ان ماما معزومة عندنا النهاردة
= اهلا وسهلا ، تقعد براحتها بس مش لازم عليا اني اقعد معاها
لا لازم يا زياد لانها ضيفة عندك
= بس دي امك أنتي مش امي انا ، يعني أنتي اللي تقعدي معاها اما انا مش مهم
ايه الكلام اللي انت بتقوله دا
= زي ماانتي سامعة كدا يا سلمى
مالك يا زياد في ايه
= مالي يعني في ايه
" صوته كان عالي لدرجة ان ماما جت و دخلت الأوضة
مالكو في ايه
= شوفي بنتك يا حماتي ، جاية عايزة تتخانق معايا من غير سبب
ازاي يعني يا زياد
= والله معرفش شوفي أنتي
" لقيت ماما بتوجهلي الكلام وبتقول
في ايه يا سلمى
= كنت بتكلم معاه يا ماما عشان يطلع يقعد معانا ، بعد كدا اتعصب عليا
ويطلع يقعد ليه يا حبيبتي ، هو أنا غريبة ولا ايه ، انا قاعدة في شقة بنتي
" بصيت على زياد لقيته استغرب و اتعجب من كلام ماما
شقة بنتك!!
= اه يا حبيبي ، انت ناسي انك كتبتها بإسمها
ماهو دا أكبر غلط انا عملته في حياتي
= والله يا حبيبي اللي مش عاجبه يطلع برا
يعني ايه
= يعني اطلع برا يا زياد!