فرحتى بعزوتى💙
الفصل الاول
بقلم دنيا عادل
صحيت من النوم على صوت ماما وهى بتقولى الساعة ٨:٣٠ راحت عليا نومه وإتأخرت على الكلية قمت جرى عشان أجهز وانزل
- تعالى إفطرى الأول
= لا يا ماما يادوب ألحق المحاضر ة هفطر وأنا فى الطريق عايزة حاجة يا حبيبتى
- ترجعى بالسلامه خدى بالك من نفسك
= حاضر مع السلامه يا ست الكل
استووووب نسيت اعرفكم بنفسي
أنا فرح عندى ٢١ سنة كلية فنون جميلة وبحب كليتي اووووووووى عيونى بلون السماء وعندى غمازة واحده يتيمه😊 بس قمر كده اللهم لا غرور😌 بابا توفى من تلت سنين وعايشه أنا وماما وعندى أخ عنده ٢٥ سنه بس مسافر🙂 المهم هسيبكم دلوقتى عشان متأخره على محاضرة الدكتور الرخم وممكن يطردنى وهنتعرف على بعض اكتر مع الأحداث ....
الفون رن......
- قبل ما تتكلمى نص كلمه دقيقتين وهكون قدامك
=طب لما تجيلى... وقفلت فى وشى..
فرح بتكلم الفون كأنها بتكلم شخص قدامها: عادى متفاجأتش وأى الجديد يا أستاذة دينا إنك تقفلى فى وشى أخدت مناعه خلاص... ( دى تبقى دينا صاحبتى واختى هى إللى طلعت بيها من صحابي كلهم أنا وهى مع بعض من الحضانه ماما ومامت دينا بيحبوا بعض جدا وصحاب ليها أخ بس مسافر بردو🙂 ودينا بتحب..... ولا أقولكم خليها مفاجأه هتعرفوا مع الأحداث...) بقلمى: دنيا عادل💙
وصلت الكلية لقيتها منتظرانى
أنا: قبل ما تتكلمى عندنا محاضرة بعد المحاضرة اعملى إللى انتى عايزاه
دينا: طب اى هنفضل واقفين كده كتير والدكتور زمانه دخل
أنا: حبيبيييييي يلا يا صاحبي
دخلنا المحاضرة أنا ودينا من غير الدكتور ما ياخد باله😂وكأننا عملنا انجاز🙃
الدكتور وهو مدينا ضهره: الاتنين إللى لسه جايين ودخلوا بدون إستأذان زى ما دخلوا يخرجوا تانى
- هو شافنا ازاى ده مركب عيون فى قفاه وأنا معرفش...
دينا: أسفين يا دكتور آخر مرة وربنا
الدكتور: أنا قلت كلمه تتنفذ على براااا
أنا بينى وبين نفسي حاسه انى سمعت الصوت ده قبل كده بس مركزتش كتير اخدت دينا واحنا خارجين منا مينفعش اقعد ساكته دا انا يحصلى حاجة لو متكلمتش : برا برا تعالى يا بنتى نفطر دا على أساس أن احنا طالعين من الجنه جتك القرف فى حلاوة بدلتك🙂
الدكتور: طب تعالى يا ام لسانين انتى
دينا: منك لله روحنا فى داهيه بسببك
انا: هو بينادينى أنا😳
الدكتور: اومال انا
دينا: قابلى بقي أنا معرفكيش
كنت بحاول أكون شجاعه قدامه : احم نعم يا دكتور
الدكتور كان لسه مدينا ضهره أول ما لف
انا مصدومه كان لابس نضارة ومدارية عيونه بس ملامحه كانت قمر وكمان حاسه انى شيفاه قبل كده : يخرب عقل جمالك هو فى كده ....
الدكتور ابتسم كده واتكثف من كلمتى ماهو بصراحه عنده حق هو اى إللى أنا قلته دا
انا بعد ما تداركت الموقف: اى ده انت مين اومال فين الرخم إللى كان هنا أقصد الدكتور إللى كان هنا🙂
الدكتور برفعة حاجبه بعد ما حاول يدارى ابتسامته ويكون جد : طب وليه دكتور بقي بعد رخم
أنا: احم طيب تمام استأذن أنا بقي أنا كده شايله المادة ولسه همشي بس صوته وقفنى
الدكتور : فرح على برا وروحى افطرى براحتك ودينا هتحضر المحاضرة
أنا بصيت عليه كده إللى هو انت تعرف اسمى منين ورجعت بصيت على دينا صاحبتى إللى لقيتها واقفه متنحه
روحت لدينا هزيتها كده وبقولها: هو مين ده و سمعتى قال اى
دينا وهى لسه سرحانه: دا يبقي أحم...
قطعنا صوت الدكتور وهو بيقول: سمعتوا أنا قلت اى
بسرعه أنا ودينا عملنا إللى قال عليه او بمعنى أصح عكس إللى قال عليه هى خرجت وأنا دخلت احضر المحاضرة وأنا مش مستوعبه حاجة و....
الطلبة كلهم ضحكوا علينا والدكتور كان بيحاول ميضحكش بس عيب هو مكشوف أصلا..
شاور لحدا من الطلبة ينادى على دينا ثوانى ودينا كانت رجعت
دينا: نعم يا دكتور
الدكتور وهو بيضحك: ادخلى يلا عشان المحاضرة هتبدأ
دينا دخلت قعدت جنبى و لسه بتقولى على حاجة ولكن....
الدكتور بص لدينا وكأنه بيمنعاها تتكلم معايا فى حاجة وقال : دينا تعالى اقعدى هنا
دينا قامت من جنبى وراحت قعدت فى مكانى تاني و......